နိုင်ငံ့စီးပွားတိုးတက်ရေးနှင့် ထုတ်ကုန်ပစ္စည်းများ တိုးမြှင့်နိုင်ရေး

နိုင်ငံ့စီးပွားတိုးတက်ရေးနှင့် ထုတ်ကုန်ပစ္စည်းများ တိုးမြှင့်နိုင်ရေး

မြန်မာနိုင်ငံသည် စစ်မှန်၍ စည်းကမ်းပြည့်ဝသော ပါတီစုံဒီမိုကရေစီစနစ်ကို ကျင့်သုံးလျက်ရှိသည့် နိုင်ငံဖြစ်သည်။ အဆိုပါစနစ်ကိုကျင့်သုံးနိုင်ရန်အတွက် တပ်မတော်သည်လိုအပ်သည့်အခင်းအကျင်းပေါင်း မြောက်မြားစွာကို စနစ်တကျ တည်ဆောက်ပေးထားပြီး  ၂ဝ၁၁  ခုနှစ်တွင်  စစ်မှန်၍စည်းကမ်းပြည့်ဝသော ပါတီစုံဒီမိုကရေစီစနစ်ကို စတင်လျှောက်လှမ်းစေခဲ့သည်။ တတိယအစိုးရသက်တမ်းအဖြစ် ၂ဝ၂ဝ ပြည့်နှစ်တွင်  ပါတီစုံဒီမိုကရေစီ အထွေထွေရွေးကောက်ပွဲကျင်းပသည်။  အဆိုပါရွေးကောက်ပွဲတွင် မဲမသမာမှုများစွာ ဖြစ်ပေါ်ခဲ့သည်။  ဖြစ်ပေါ်ခဲ့သည့် မဲမသမာမှုများကို ခိုင်လုံသော သက်သေအထောက်အထားများစွာဖြင့် ပြည်တွင်း၊ ပြည်ပက သိရှိအောင် သတင်းစာရှင်းလင်းပွဲများ ကျင်းပကာ ပွင့်လင်းမြင်သာစွာ ပြသခဲ့သည်။

၂ဝ၂ဝ ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲမဲမသမာမှုသည် စစ်မှန်၍စည်းကမ်း ပြည့်ဝသော ပါတီစုံဒီမိုကရေစီလမ်းကြောင်းကိုထိခိုက်စေခဲ့သည်။ ထို့ကြောင့်နိုင်ငံတော်တွင် အရေးပေါ်ကာလဆိုင်ရာ ပြဋ္ဌာန်းချက် များနှင့်အညီ နိုင်ငံတော်စီမံအုပ်ချုပ်ရေးကောင်စီ အစိုးရတစ်ရပ် ပေါ်ပေါက်လာရခြင်း ဖြစ်သည်။ အနောက်နိုင်ငံ များအနေဖြင့် စီးပွားရေးပိတ်ဆို့မှုများကို လုပ်ဆောင်ခဲ့ပြီး အထောက်အပံ့ပေးအပ်မှုကိုလည်း  လျှော့ချခဲ့သည်။ ထိုသို့စီးပွားရေး ပိတ်ဆို့မှုများကြောင့် မိမိတို့နိုင်ငံပိုင်နိုင်ငံခြားငွေများ သုံးစွဲမှုမပြုနိုင်ခဲ့ခြင်း ဖြစ်သည်။ ထို့ကြောင့် နိုင်ငံတော်အစိုးရအနေဖြင့် ကုန်သွယ်မှုများမှ ရရှိသည့်ငွေများကို အဓိကထား သုံးစွဲနေရခြင်း ဖြစ်သည်။

မြန်မာနိုင်ငံသို့ ယခင်ကပြည်ပမှ ဝင်နေသည့် ဝင်ငွေများမှာလည်း ချေးငွေများ၊ ထောက်ပံ့ငွေများ၊ နိုင်ငံခြား ရင်းနှီးမြှုပ်နှံမှုများ ဖြစ်သည်။ နိုင်ငံတော်စီမံအုပ်ချုပ်ရေး ကောင်စီအနေဖြင့် ပြည်ပချေးငွေများကို    တတ်နိုင်သမျှ ပြန်လည်ပေးဆပ်လျက်ရှိသည်။    အဓိကအားဖြင့် ကုန်သွယ်မှုများ ဆောင်ရွက်နိုင်ရန်အတွက် ကုန်ထုတ်လုပ်မှုများ တိုးတက်အောင်  ဆောင်ရွက်ကြရမည်ဖြစ်သည်။ ပြည်တွင်းထုတ်ကုန်ပစ္စည်းများကို ပြည်ပသို့ တင်ပို့နိုင်ရန်အတွက် အရည်အသွေးကောင်းမွန်အောင် ဆောင်ရွက်ကြရမည်ဖြစ်သည်။   ပြည်ပသို့ကုန်ပစ္စည်းများ ပိုမိုတင်ပို့နိုင်မှသာ နိုင်ငံခြားငွေများ တိုးတက်ရရှိပြီး နိုင်ငံ့စီးပွားရေး တိုးတက်လာမည် ဖြစ်သည်။ ထို့ကြောင့် နိုင်ငံတော်အစိုးရအနေဖြင့် တိုးတက်ကောင်းမွန်လာသည့် စီးပွားရေး မောင်းနှင်အားကို မဏ္ဍိုင်ပြု၍ MSME စက်မှုလုပ်ငန်းများကို အားပေးဆောင်ရွက်ကာ ပို့ကုန်ကဏ္ဍမြှင့်တင်ရေးကို ဆောင်ရွက်နေခြင်း ဖြစ်သည်။

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်သည် သြဂုတ်လ ၃ဝ ရက်နေ့က ပဲခူးတိုင်းဒေသကြီး အစိုးရအဖွဲ့ဝင်များအား တွေ့ဆုံ၍ ဒေသဖွံ့ဖြိုး တိုးတက်ရေးဆိုင်ရာများ ဆွေးနွေးပြောကြားစဉ် ‘‘နိုင်ငံ့စီးပွားတိုးတက်ရေးနှင့် ထုတ်ကုန်ပစ္စည်းများ တိုးမြှင့်နိုင်ရေးအတွက်  နိုင်ငံ၏ အဓိက စီးပွားရေးလုပ်ငန်းများဖြစ်သည့်   စိုက်ပျိုးမွေးမြူရေးကို အခြေခံသည့် ကုန်ထုတ်လုပ်ငန်းများကို အားပေးဆောင်ရွက်ရမည် ဖြစ်ကြောင်း၊ စိုက်ပျိုးရေးနှင့်ပတ်သက်၍ သီးနှံများဖြစ်ထွန်းအောင်မြင်ပြီး  အထွက်နှုန်းကောင်းမွန်စေရေး မျိုး၊ မြေ၊ ရေ၊ နည်းဟူသည့် နည်းလမ်း(၄)သွယ်ဖြင့်  ဆောင်ရွက်သွားရန် လိုကြောင်း၊ အထွက်နှုန်းများ တိုးတက်လာမည်ဆိုပါက စိုက်ပျိုးရေးတောင်သူများ ဝင်ငွေပိုမိုရရှိလာမည် ဖြစ်ကြောင်း၊ ထိုမှတစ်ဆင့်နိုင်ငံအတွက်လည်း ဝင်ငွေများရရှိပြီး နိုင်ငံ့စီးပွားရေးကို အထောက်အကူပြု စေမည်ဖြစ်ကြောင်း’’ ထည့်သွင်းပြောကြားခဲ့သည်။

ပဲခူးတိုင်းဒေသကြီး အနေဖြင့် စိုက်ပျိုးရေးနှင့် မွေးမြူရေးလုပ်ငန်းများကို အခြေခံသည့် ကုန်ထုတ်လုပ်ငန်းများ၊  စက်မှုလုပ်ငန်းများ ဖွံ့ဖြိုးတိုးတက်လာအောင်  ဆောင်ရွက်ကြရမည် ဖြစ်သည်။

စက်မှုကုန်ထုတ်လုပ်ငန်းများကိုဆောင်ရွက်နိုင်သည့် ရော်ဘာ၊ ကော်ဖီ၊ ကြံ၊ ဝါနှင့်လက်ဖက်တို့ကိုလည်း တိုးချဲ့စိုက်ပျိုးကြရမည် ဖြစ်သည်။  နိုင်ငံတော်၏ စီးပွားရေးဖွံ့ဖြိုးတိုးတက်လာပါက နိုင်ငံသူ၊ နိုင်ငံသားတို့၏ လူမှုစီးပွားဘဝများလည်း  ဖွံ့ဖြိုးတိုးတက်လာမည်ဖြစ်ကာ သာယာဝပြောမှုရှိလာမည် ဖြစ်သည်။ စီးပွားရေး အားကောင်းလာမည်ဆိုပါက နိုင်ငံတိုးတက်ရေးအတွက် ပိုမိုဆောင်ရွက်နိုင်မည်ဖြစ်သည်။

ပဲခူးတိုင်းဒေသကြီးသည် ရေခံမြေခံကောင်းမွန်သည့်တိုင်းဒေသကြီးဖြစ်ပြီး အသိပညာ၊ အတတ်ပညာ ပြည့်ဝသည့် လူငယ်များ မွေးထုတ်နိုင်မည်ဆိုပါက ယခုထက်ပိုမိုဖွံ့ဖြိုးတိုးတက်လာမည်ဖြစ်သည်။ မိမိဒေသ ဖွံ့ဖြိုးတိုးတက်ရေး၊ မိမိတို့နိုင်ငံ ဖွံ့ဖြိုးတိုးတက်ရေးအတွက် မိမိတို့ပြည်သူအားလုံးတွင် တာဝန်ရှိသည်ဟူသော အသိစိတ်ဓာတ်ဖြင့် ကြိုးပမ်းလုပ်ဆောင်ကြမည်ဆိုပါက နိုင်ငံ့စီးပွားတိုးတက်ရေးနှင့် ထုတ်ကုန်ပစ္စည်းများ တိုးမြှင့်ရေး ဆောင်ရွက်ချက်များ ပိုမိုအောင်မြင်မည် ဖြစ်ပေသည်။ 

အနှစ်ချုပ်ဆိုရသော်  နိုင်ငံတော်၏စီးပွားရေး ဖွံ့ဖြိုးတိုးတက်လာပါက နိုင်ငံသူ၊ နိုင်ငံသားတို့၏ လူမှုစီးပွားဘဝများလည်း ဖွံ့ဖြိုးတိုးတက်လာမည်ဖြစ်ကာ  သာယာဝပြောမှု ရှိလာမည်ဖြစ်သဖြင့် နိုင်ငံ့စီးပွားဖွံ့ဖြိုး တိုးတက်ရေးအတွက် မိမိတို့ကျရာ အခန်းကဏ္ဍမှ ကြိုးပမ်းဆောင်ရွက်ပေးကြရန် တိုက်တွန်းရေးသားလိုက်ရပါသည်။     ။