သန့်ရှင်းသောလေရရှိဖို့ ရင်းနှီးမြှုပ်နှံမှုစတင်စို့

သန့်ရှင်းသောလေရရှိဖို့ ရင်းနှီးမြှုပ်နှံမှုစတင်စို့

အယ်ဒီတာ့အာဘော်

(၂ဝ၂၄  ခုနှစ်၊ စက်တင်ဘာ  ၆  ရက်)

လူသားတို့ အသက်ရှင်သန်နေထိုင်ရေးတွင်  သန့်ရှင်းသောလေရရှိဖို့  အလွန်အရေးကြီးသည်။ လေရှိနေ သည့်အတွက် သက်ရှိသက်မဲ့ အားလုံးရှင်သန်နေထိုင်နိုင်ကြခြင်း ဖြစ်သည်။ လေ၏ အရေးပါ အရာရောက်မှုကို လူသားတို့ ပိုမိုထင်ရှားစွာသိစေနိုင်ရန်အတွက် ၂ဝ၁၉ ခုနှစ်တွင် ကျင်းပပြုလုပ်ခဲ့သည့်  (၇၄)ကြိမ်မြောက် ကုလသမဂ္ဂအထွေထွေညီလာခံ၏ဆုံးဖြတ်ချက်(၇၄/၂၁၂)အရ လေထုညစ်ညမ်းမှုကို ဖြစ်ပေါ်စေသည့်အကြောင်းရင်းများ၊ အကျိုးသက်ရောက်မှုများနှင့် လေထုအရည်အသွေးကို တိုးတက် လာစေမည့် ဖြေရှင်းနည်းများကို ပိုမိုသိရှိနားလည်လာစေရန်အတွက် ‘‘အပြည်ပြည်ဆိုင်ရာ သန့်ရှင်း သောလေထုနေ့” အခမ်းအနားကို နှစ်စဉ်ကျင်းပပြုလုပ်ရန် ဆုံးဖြတ်ခဲ့ကြသည်။ ကမ္ဘာတစ်ဝန်းတွင် အပြည်ပြည်ဆိုင်ရာ သန့်ရှင်းသော လေထုနေ့ကို ၂ဝ၂ဝ ပြည့်နှစ်မှစတင်၍ နှစ်စဉ် စက်တင်ဘာလ ၇ ရက်နေ့တွင် ကျင်းပပြုလုပ်ခဲ့ရာ၂ဝ၂၄ ခုနှစ်တွင် ပဉ္စမအကြိမ်မြောက်အထိ ရှိလာခဲ့ပြီး ယခုနှစ်အတွက် ဆောင်ပုဒ်မှာ ‘‘သန့်ရှင်းသောလေရရှိဖို့ ရင်းနှီးမြှုပ်နှံမှုစတင်စို့” ဖြစ်သည်။

နိုင်ငံတိုင်းတွင် အပြည်ပြည်ဆိုင်ရာ သန့်ရှင်းသော လေထုနေ့ကျင်းပကြခြင်းမှာ လေထုညစ်ညမ်းမှုကို ကိုင်တွယ်ဖြေရှင်းရာတွင် ကမ္ဘာလုံးဆိုင်ရာ ဆောင်ရွက်ချက်များကို ပိုမိုမြှင့်တင်နိုင်ရန်၊ အသိပညာပေး နိုင်ရန်၊ လေထုညစ်ညမ်းမှုကို ပိုမိုနားလည်သတိပြုမိစေရန်နှင့် လေထုညစ်ညမ်းမှုကို တုံ့ပြန်ဖြေရှင်း နိုင်ရေးအတွက် ကမ္ဘာလုံးဆိုင်ရာ ဆောင်ရွက်မှုကိုမြှင့်တင်ရန်၊ လေထုညစ်ညမ်းမှုကို ဖြစ်ပေါ်စေသည့် အကြောင်းရင်းများ၊ အကျိုးသက်ရောက်မှုများနှင့် လေထုအရည်အသွေးတို့ကို တိုးတက်လာစေမည့် ဖြေရှင်းနည်းများကို ပိုမိုသိရှိနားလည်စေရန်၊ သန့်ရှင်းသော လေထုရရှိလာစေရန် အစီအစဉ်များ ချမှတ် ဆောင်ရွက်နိုင်ရန် စသည်တို့ဖြစ်သည်။

ကမ္ဘာ့ကျန်းမာရေးအဖွဲ့၏အဆိုအရ ကမ္ဘာ့လူဦးရေ၏ ၉၉ ရာခိုင်နှုန်းနီးပါးခန့်သည် ညစ်ညမ်းသော လေကိုရှူရှိုက်နေရကြောင်းသိရှိရသည်။ လေထုသည် ဓာတ်ငွေ့အများအပြားရောနှောပါဝင်နေသည့် အရောအနှောတစ်မျိုးဖြစ်လာသည်။ သန့်စင်သောလေထုတွင် အဓိကအားဖြင့် နိုက်ထရိုဂျင် ၇၈ ရာခိုင် နှုန်း၊ အောက်ဆီဂျင် ၂၁ ရာခိုင်နှုန်း၊ အခြားဓာတ်ငွေ့ ၁ ရာခိုင်နှုန်း (အများအားဖြင့် အာဂွန်၊ နီယွန်၊ ဟီလီယမ်၊ မီသိန်း၊ ခရစ်ပ်တန်၊ ဟိုက်ဒရိုဂျင်)ပါရှိသည်။ ထိုသတ်မှတ်ပမာဏထက် ပိုမိုပါဝင်နေပါက လေထုညစ်ညမ်းမှုကို ဖြစ်ပေါ်စေနိုင်သည်။ လူသားများ နေ့စဉ်ရှူရှိုက်ရန်အတွက် သန့်စင်သော လေကို ရရှိရန် လိုအပ်သည်။

လေကောင်းလေသန့်သည် လူသားတို့အတွက် အောက်ဆီဂျင်ပမာဏကို တိုးစေပြီး သွေးဖြူဥများကို ကူညီထောက်ပံ့ပေးခြင်း၊ ကိုယ်ခံအားစနစ်ကိုအားကောင်းစေခြင်း၊ အဆုတ်၊ နှလုံးနှင့် သွေးလွှတ်ကြော ဆိုင်ရာ ရောဂါများဖြစ်နိုင်ခြေကို လျှော့ချပေးခြင်း၊ အဆုတ်ကို သန့်ရှင်းစေခြင်း၊ ပန်းနာ ရင်ကျပ်နှင့် ဓာတ်မတည့်မှု လက္ခဏာများ လျော့ကျစေခြင်း၊ စိတ်ကြည်လင် လန်းဆန်းစေခြင်း၊ အစာခြေဖျက် စနစ်ကောင်းမွန်စေခြင်း၊ သက်ရှိဂေဟစနစ် ကောင်းမွန်လာခြင်းတို့ဖြင့် ကောင်းကျိုးကို ပြုလျက်ရှိသည်။ ထို့ကြောင့် လူသားတိုင်းက မိမိတို့ကို ကောင်းကျိုးပြုနေသော လေထုကို သန့်ရှင်းစေအောင် ဂရုစိုက် ကြရမည်ဖြစ်သည်။

လေကောင်းလေသန့်သည် ကောင်းကျိုးဖြစ်ထွန်းစေသကဲ့သို့ လေထုညစ်ညမ်းနေပါကလည်း ကမ္ဘာကြီး ပူနွေးလာခြင်း၊ ပင်လယ်ရေမျက်နှာပြင် မြင့်တက်လာခြင်း၊ အပူချိန်မြင့်တက်လာခြင်း၊ ရာသီဥတု ပြောင်းလဲလာခြင်း၊ အဏ္ဏဝါရေစီးကြောင်းများ ပြောင်းလဲလာခြင်း၊ အပင်နှင့်တိရစ္ဆာန်များအပေါ် ထိခိုက် နိုင်မှုများပြားလာခြင်း၊ စိုက်ပျိုးရေးအထွက်နှုန်းများ ပြောင်းလဲလာခြင်း၊ ကူးစက်ရောဂါများ ဖြစ်ပွားခြင်း နှင့် အက်စစ်မိုးများရွာသွန်းခြင်း စသည့်ဆိုးကျိုးများ သက်ရောက်လာနိုင်သည်။ လေထုညစ်ညမ်းခြင်း ကြောင့် လူသားတို့တွင် အသက်ရှူလမ်းကြောင်းဆိုင်ရာ ရောဂါများ၊ နှလုံးဆိုင်ရာရောဂါများ၊ အဆုတ် ရောင်ရောဂါများ၊ ပန်းနာရင်ကျပ်ရောဂါများ၊ ချောင်းဆိုးခြင်း၊ လည်ချောင်းယားယံခြင်း၊ မျက်ခမ်း စပ်ခြင်းနှင့် မျက်ရည်ယိုခြင်း၊  နှာစေးခြင်း၊ ခေါင်းကိုက်ခြင်း၊ မူးဝေခြင်း၊ ရင်ဘတ်အောင့်ခြင်း၊ လေထု ညစ်ညမ်းမှုကြောင့် မြင်ကွင်းရှင်းလင်းမှုကို လျော့နည်းစေခြင်းတို့ ဖြစ်စေသည်။

လူသားတို့စွမ်းအားသည် ကြီးမားလှသည်။ အဆိုးရှိလျှင် အကောင်းရှိအောင် လုပ်ဆောင်နိုင်စွမ်းရှိသည်။  လေထုညစ်ညမ်းမှုအား လျှော့ချနိုင်မည့် နည်းလမ်းများကိုလည်း သိရှိလုပ်ဆောင်ကြရမည် ဖြစ်သည်။ ထင်း၊ မီးသွေးများကို လျှော့ချသုံးစွဲခြင်း၊ လေဝင်လေထွက် ကောင်းအောင်ဆောင်ရွက်ခြင်း၊ ဖယောင်း တိုင်၊ အမွှေးတိုင်၊ ခြင်ဆေးခွေအသုံးပြုမှုများကို လျှော့ချခြင်း၊ အနံ့မွှေးစေရန်အသုံးပြုသော Air   Fresher များ အသုံးပြုခြင်းမှ ရှောင်ကြဉ်ခြင်းတို့ လုပ်ဆောင်ရမည်။ စိုက်ပျိုးရေးတွင် ဓာတုဗေဒဆေးအစား ဇီဝဗေဒဆေးများ အသုံးပြုခြင်း၊ လောင်စာဆီသုံးစွဲမှုလျှော့ချခြင်း၊ ကျန်းမာရေးနှင့် ညီညွတ်သော အစားအစာများကို စားသုံးခြင်း၊ ပြန်လည်ပြည့်ဖြိုးမြဲ စွမ်းအင်များအား အသုံးပြုခြင်း၊ စွမ်းအင်သုံးစွဲမှု သက်သာသည့် လျှပ်စစ်ပစ္စည်းများကို သုံးစွဲခြင်း၊ ဆေးလိပ်သောက်ခြင်းကိုရှောင်ကြဉ်ခြင်း၊ မီးရထား၊ ဘတ်စကား၊ သင်္ဘော စသည့် အများပြည်သူသုံးယာဉ်များ အသုံးပြုခြင်းတို့ဖြင့် လေထုညစ်ညမ်းမှုကို ကာကွယ်ကြရမည်ဖြစ်သည်။ အနှစ်ချုပ်ဆိုရသော် ‘‘သန့်ရှင်းသောလေရရှိဖို့ ရင်းနှီးမြှုပ်နှံမှုစတင်စို့” ဆောင်ပုဒ်နှင့်အညီ ဆောင်ရွက်ကြရန်ဖြစ်ပါကြောင်း ရေးသားလိုက်ရပေသည်။  ။