တရုတ်နိုင်ငံ ကွမ်ကျိုးမြို့ ကွမ်တုံနိုင်ငံခြားဘာသာနှင့် ပြည်ပကုန်သွယ်ရေး တက္ကသိုလ်တွင် စာပေ ဟောပြောပွဲကျင်းပ
ကွမ်ကျိုး စက်တင်ဘာ ၇
မြန်မာနိုင်ငံဆိုင်ရာ တရုတ်ပြည်သူ့ သမ္မတနိုင်ငံ ယဉ်ကျေးမှုသံရုံး၏ ဖိတ်ကြားချက်အရ ကွမ်ကျိုးမြို့၌ ရောက်ရှိနေသော မြန်မာနိုင်ငံစာရေးဆရာအသင်းဥက္ကဋ္ဌ ဦးအုန်းမောင် (မြင်းမူမောင်နိုင်မိုး) ဦးဆောင် သည့် စာပေယဉ်ကျေးမှု ပူးပေါင်းဖလှယ်ရေးအဖွဲ့သည် စက်တင်ဘာလ ၆ ရက် နံနက်၁၀ နာရီတွင် ကွမ်ကျိုးမြို့ရှိ ကွမ်တုံနိုင်ငံခြားဘာသာနှင့် ပြည်ပကုန်သွယ်ရေး တက္ကသိုလ်သို့ရောက်ရှိရာ အဆိုပါ တက္ကသိုလ် နိုင်ငံတကာဆက်ဆံရေးနှင့် ပူးပေါင်းဆောင်ရွက်ရေးဌာနမှူး ကျိုးဖုန်(Zhou Peng)၊ အရှေ့တိုင်း ဘာသာစကားနှင့် ယဉ်ကျေးမှုကောလိပ်မှ ပါမောက္ခ လျိုကျစ်ချန်(Liu Zhi Qiang)၊ မြန်မာစာ ဘာသာဌာနမှူး ကျန်းဝေ့ကော (Zhong Wei Guo)၊ မြန်မာဘာသာဌာန မြန်မာစာကထိကဆရာမ ဝူတီ(WuDi)၊ မြန်မာစာဆရာ ကျောက်ချိုင်ကျွင်း(Zhuo Cai Jun) တို့က ကြိုဆိုနှုတ်ခွန်းဆက် စကားများ ပြောကြားကြပြီး မြန်မာနိုင်ငံစာရေးဆရာ အသင်းဥက္ကဋ္ဌ ဦးအုန်းမောင် (မြင်းမူမောင်နိုင်မိုး)က ကျေးဇူးတင် စကားပြန်လည် ပြောကြားသည်။
ထို့နောက် မြန်မာနိုင်ငံ စာရေးဆရာအသင်းဥက္ကဋ္ဌ ဦးအုန်းမောင်(မြင်းမူမောင်နိုင်မိုး)၊ စာရေးဆရာ ရန်ပိုင်ဥက္ကာ၊ စာရေးဆရာမ တက္ကသိုလ်မြမဉ္စူ၊ စာရေးဆရာတော်ကောင်းမင်းတို့က မြန်မာကဗျာ မြန်မာစာနှင့် ပတ်သက်သည်များကို ဟောပြောဆွေးနွေးကြသည်။
အဆိုပါ တွေ့ဆုံပွဲသို့ မြန်မာစာအဓိက ဘာသာရပ်ကို သင်ကြားပို့ချပေးနေသော တရုတ်လူမျိုးဆရာ၊ ဆရာမများ၊ မြန်မာစာအဓိက သင်ယူလျက်ရှိသော တရုတ်လူမျိုးတက္ကသိုလ်ကျောင်းသား၊ ကျောင်းသူ များတက်ရောက်ခဲ့ကြပြီး တွေ့ဆုံပွဲအပြီးတွင် နှစ်နိုင်ငံချစ်ကြည်ရင်းနှီးမှုအတွက် အမှတ်တရ စာပေ လက်ဆောင်များ အပြန်အလှန် ပေးအပ်ခဲ့ကြသည်။
(သတင်းစဉ်)