ရန်ကုန်တိုင်းဒေသကြီး အစိုးရအဖွဲ့နှင့် ဌာနဆိုင်ရာများ အဋ္ဌမအကြိမ်မြောက် မိုးရာသီ သစ်ပင်စိုက်ပျိုး
ရန်ကုန် စက်တင်ဘာ ၈
ရန်ကုန်တိုင်းဒေသကြီး အစိုးရအဖွဲ့နှင့် တိုင်းဒေသကြီး ဌာနဆိုင်ရာများ အဋ္ဌမအကြိမ်မြောက် မိုးရာသီသစ်ပင်စိုက်ပျိုးပွဲ အခမ်းအနားကို ယနေ့နံနက်ပိုင်းတွင် မင်္ဂလာဒုံမြို့နယ် လှော်ကားရေဝေရေလဲဒေသ၌ ကျင်းပသည်။
ရှေးဦးစွာ ရန်ကုန်တိုင်းဒေသကြီး ဝန်ကြီးချုပ် ဦးစိုးသိန်းက အမှာစကား ပြောကြားရာတွင် သဘာဝပတ်ဝန်းကျင် တည်တံ့ကောင်းမွန်မှ နိုင်ငံတော်ဖွံ့ဖြိုး တိုးတက်ရေးကို စဉ်ဆက်မပြတ် ဆောင်ရွက်နိုင်မည်ဖြစ်၍ သစ်ပင်များစိုက်ပျိုးခြင်းကို
ပြည်သူများအနေဖြင့် အလေးထား ဆောင်ရွက်ကြရန်နှင့် သစ်ပင်၊ သစ်တောများသည် လူသားတို့အပါအဝင် သက်ရှိလောကအတွက် တည်မြဲနေရန် သစ်ပင်များကို အားလုံးဝိုင်းဝန်း ပူးပေါင်း၍ စနစ်တကျ စိုက်ပျိုး ထိန်းသိမ်းကြရန် ပြောကြားသည်။
ထို့နောက် တိုင်းဒေသကြီးဝန်ကြီးချုပ်၊ ရန်ကုန်တိုင်းစစ်ဌာနချုပ် တိုင်းမှူး ဗိုလ်ချုပ်ဇော်ဟိန်း၊ တိုင်းဒေသကြီးဝန်ကြီးများနှင့် တာဝန်ရှိသူတို့က သစ်ပင်များ စိုက်ပျိုးပေးကြပြီး တိုင်းဒေသကြီး ဌာနဆိုင်ရာများမှ တာဝန်ရှိပုဂ္ဂိုလ်များနှင့် ဝန်ထမ်းများ၏ သစ်ပင်စိုက်ပျိုး ပေးနေမှုများကို လှည့်လည်ကြည့်ရှုအားပေးကြသည်။
ယနေ့ မိုးရာသီသစ်ပင်စိုက်ပျိုးပွဲတွင် ကျွန်းပင် ၁၀၀၀၊ ပျဉ်းကတိုးပင် ၄၀၀၀၊ ရေတမာပင် ၁၀၂၀၊ ဆီသပြေပင် ၁၀၀၀၊ ပိန္နဲ ၅၄၀ ပင်နှင့် သရက် ၅၄၀ ပင် စုစုပေါင်း အပင် ၈၁၀၀ ကို စိုက်ပျိုးပေးခဲ့ကြပြီး ယခုနှစ်အတွင်း စုစုပေါင်းအရိပ်ရ ပင်ပေါင်း ၁၀၃၆၉၈၁ ပင် စိုက်ပျိုးခဲ့ပြီး ဖြစ်ကြောင်း သိရသည်။