ရေကြီးနစ်မြုပ်၍ ထိခိုက်ပျက်စီးခဲ့သော ဧရိယာများ၌ ဝင်ငွေရ သီးနှံတစ်မျိုးမျိုးကို စိုက်ပျိုးနိုင်ရေး တာဝန်ရှိသူများ ကွင်းဆင်းစစ်ဆေး

ရေကြီးနစ်မြုပ်၍ ထိခိုက်ပျက်စီးခဲ့သော ဧရိယာများ၌ ဝင်ငွေရ သီးနှံတစ်မျိုးမျိုးကို စိုက်ပျိုးနိုင်ရေး တာဝန်ရှိသူများ ကွင်းဆင်းစစ်ဆေး

နေပြည်တော်   စက်တင်ဘာ   ၂၀

    မိုးသည်းထန်စွာ ရွာသွန်းမှုကြောင့် ဖြစ်ပေါ်ခဲ့သည့် ရေကြီးရေလျှံမှုတွင် ထိခိုက်ပျက်စီးခဲ့သည့် မိုးသီးနှံများ ရာသီအချိန်မီ ပြန်လည်စိုက်ပျိုးနိုင်ရေးအတွက် ခရိုင်နှင့် မြို့နယ်အသီးသီး၌ စိုက်ပျိုးရေးဦးစီးဌာန တာဝန်ရှိသူများက ကွင်းဆင်းဆောင်ရွက်လျက်ရှိရာ စက်တင်ဘာလ ၁၉ ရက်တွင်  ညွှန်ကြားရေးမှူးချုပ် ဒေါက်တာရဲတင့်ထွန်းနှင့်အဖွဲ့သည်   နေပြည်တော်ကောင်စီ နယ်မြေအတွင်းရှိ  တောင်သူများအား ကျေးရွာအရောက် သွားရောက်တွေ့ဆုံ၍ ရေကြီးရေလျှံမှုကြောင့် အမှန်တကယ် သီးနှံစိုက်ပျိုးဆုံးရှုံးခဲ့သည့်  တောင်သူများအနေဖြင့်  ရာသီချိန်မီ ပြန်လည်စိုက်ပျိုး လုပ်ကိုင်ကြမည်ဆိုပါက ထိရောက်စွာ  ကူညီဆောင်ရွက်ပေးသွားမည့် အခြေအနေများ၊ သီးနှံချေးငွေဆိုင်ရာ အခက်အခဲများ   ရင်ဆိုင်ဖြေရှင်းနိုင်မည့် နည်းလမ်းများနှင့် အခွင့်အလမ်းများ၊ တောင်သူ၏ ရင်းနှီးမြှုပ်နှံနိုင်မှု အခြေအနေအရ  မျိုးစေ့အပါအဝင် သွင်းအားစုစရိတ် လျှော့ချပြီး သီးနှံအထွက်နှုန်း ကောင်းမွန်စေရေး ဆောင်ရွက်ရန် လိုအပ်ချက်များ၊  ကျေးရွာအလိုက် စိုက်ပျိုးမည့်  သီးနှံနှင့် လိုအပ်ချက်များကို  စနစ်တကျပြုစု တင်ပြနိုင်ရေးဆိုင်ရာ ကိစ္စရပ်များကို ဆွေးနွေးကြသည်။

တောင်သူများနှင့်တွေ့ဆုံစဉ် ညွှန်ကြားရေးမှူးချုပ်ကတောင်သူများအနေဖြင့် မိုးစပါးအချိန်မီ ပြန်လည်စိုက်ပျိုး လိုပါက သက်တမ်းတို မျိုးစပါးအသုံးပြု စိုက်ပျိုးနိုင်ရေး အပါအဝင်လိုအပ်ချက်များကို ကူညီပံ့ပိုးပေးသွားမည် ဖြစ်ကြောင်း၊ အကယ်၍ စပါးသီးနှံပြန်လည်စိုက်ပျိုးရန် အခက်အခဲရှိပါက အခြားဝင်ငွေရသီးနှံ တစ်မျိုးမျိုးကို စိုက်ဖြစ်အောင် စိုက်ပျိုးသွားကြရန် တိုက်တွန်းလိုကြောင်း၊ သို့မှသာ ယခုရာသီအတွက်     တောင်သူများ ဝင်ငွေမဆုံးရှုံးစေဘဲ နောက်ရာသီတွင် စိုက်ပျိုးလုပ်ကိုင်ရန် အရင်းအနှီးအဖြစ် လည်ပတ်လုပ်ကိုင်နိုင်ကြမည်ဖြစ်ကြောင်း ဆွေးနွေးပြောကြားသည်။

 အလားတူ စိုက်ပျိုးရေးဦးစီးဌာန စပါးသီးနှံဌာနခွဲ  ညွှန်ကြားရေးမှူးနှင့် နေပြည်တော် စိုက်ပျိုးရေးဦးစီးဌာနမှူးတို့  ဦးဆောင်သော တိုင်းဒေသကြီး/ ခရိုင် မြေ၊ မျိုး၊ ပိုးတာဝန်ခံများ နှင့်အဖွဲ့သည် စက်တင်ဘာလ  ၂၀ ရက်  နံနက်ပိုင်းတွင် ဇေယျာသီရိမြို့နယ် ကျည်တောင်အုပ်စု မွန်းတည့်ခွင်ကျေးရွာရှိ တောင်သူ ဦးညွန့်တင်၏ မိုးစပါး ရေကြီးနစ်မြုပ် ထိခိုက်ပျက်စီးလျက်ရှိသော သုည ဒသမ  ၅ ဧက အား ဝမ်းစာစပါးရရှိရေးအတွက် စပါးလမိုင်း (ratoon)ထားရှိရေး  ပညာပေး ဆောင်ရွက်ကြသည်။

ဆက်လက်၍ တောင်သူ ဦးမျိုးဝင်းထွန်း၏ မိုးစပါးစိုက်ခင်းနှစ်ဧက၌    ဖြုတ်ပိုးကြိုတင် ကာကွယ်နိုင်ရေး အတွက် စုပေါင်းဆေးဖျန်းခြင်းကို နည်းပညာပေး ဆောင်ရွက်ပြသကြကြောင်း သိရသည်။