နိုင်ငံတော်၏ အနာဂတ်ခရီး သာယာဖြောင့်ဖြူးရေး
အယ်ဒီတာ့အာဘော်
(၂ဝ၂၄ ခုနှစ်၊ စက်တင်ဘာ ၂၃ ရက်)
မြန်မာနိုင်ငံသည် အချုပ်အခြာအာဏာပိုင် လွတ်လပ်သည့်နိုင်ငံဖြစ်သည်။ နိုင်ငံတော်ကိုပြည်ထောင်စု သမ္မတမြန်မာနိုင်ငံတော်ဟု ခေါ်တွင်ရမည်။ နိုင်ငံတော်သည် တိုင်းရင်းသားလူမျိုးပေါင်းစုံတို့ စုပေါင်း နေထိုင်ကြသော နိုင်ငံဖြစ်သည်။ နိုင်ငံတော်၏ အချုပ်အခြာအာဏာသည် နိုင်ငံသားများထံမှ ဆင်းသက်ပြီး နိုင်ငံတော်တစ်ဝန်းလုံး၌ တည်သည်။ နိုင်ငံတော်၏မြေထု၊ ရေထုနှင့်လေထုတို့ ပါဝင်သော နယ်နိမိတ်သည် နိုင်ငံတော်ဖွဲ့စည်းပုံ အခြေခံဥပဒေ(၂ဝဝ၈ ခုနှစ်) အတည်ဖြစ်သည့်နေ့တွင် တည်ရှိသည့်အတိုင်းဖြစ်သည်။
ဤသည်မှာနိုင်ငံတော်ဖွဲ့စည်းပုံ အခြေခံဥပဒေ(၂ဝဝ၈ ခုနှစ်)အခန်း(၁)တွင် ဖော်ပြထားသည့်နိုင်ငံတော်၏ အခြေခံမူများဖြစ်သည်။
လွတ်လပ်သည့်အချုပ်အခြာအာဏာပိုင် နိုင်ငံတစ်နိုင်ငံဖြစ်သည်နှင့်အညီ နိုင်ငံတော်၏ ပိုင်နက် နယ်မြေတည်တံ့ခိုင်မြဲမှုနှင့် နိုင်ငံရေးအရ လွတ်လပ်မှုကို ပြိုကွဲပျက်စီးရန် လုပ်ဆောင်လာမှုမှန်သမျှကို နိုင်ငံတစ်နိုင်ငံ၏ အခွင့်အရေးဖြစ်သည့် ကာကွယ်ခုခံပိုင်ခွင့်အနေဖြင့်တုံ့ပြန်ဆောင်ရွက်ခွင့် အပြည့်အဝရှိသည်။ဤသည်မှာ မြန်မာနိုင်ငံတစ်ခုတည်းသာ မဟုတ်ဘဲ ကမ္ဘာ့နိုင်ငံအားလုံးတွင် ရှိသော အခွင့်အရေးဖြစ်သည်။ လက်ရှိနိုင်ငံတော်အစိုးရအနေဖြင့် ထာဝရငြိမ်းချမ်းရေး၊ ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စု တည်ဆောက်ရေးကို ရှေးရှုဆောင်ရွက်ပေးလျက်ရှိသည်။
ထိုသို့ဆောင်ရွက်လျက်ရှိနေချိန်တွင် တိုင်းရင်းသား လက်နက်ကိုင်အဖွဲ့ အချို့အနေဖြင့် နိုင်ငံတော်တွင် ဖြစ်ပေါ်နေသည့် နိုင်ငံရေးအကျပ်အတည်းကို အခွင့်ကောင်းယူပြီး နယ်မြေချဲ့ထွင်ရန် လုပ်ဆောင်လာမှုများမှာ နိုင်ငံတော်၏ ပိုင်နက်နယ်မြေ တည်တံ့ခိုင်မြဲမှုနှင့် နိုင်ငံရေးအရ လွတ်လပ်မှုကို ထိပါးနှောင့်ယှက် လာခြင်းဖြစ်သည်။ တိုင်းရင်းသားလက်နက်ကိုင် အကြမ်းဖက်သောင်းကျန်းသူများ၏ အကြမ်းဖက်လုပ်ရပ်များကြောင့် ဒေသခံတိုင်းရင်းသား ပြည်သူများမှာ ယာယီနေရပ်စွန့်ခွာရမှုများနှင့် ရင်ဆိုင်ကြုံတွေ့ရသည်။ အကြမ်းဖက်သောင်းကျန်းသူများက မြို့ရွာများတွင် အဓမ္မဝင်ရောက် နေထိုင်လာကြပြီး
တပ်မတော်၏တန်ပြန် ထိုးစစ်ဆင်မှုကို ကာကွယ်ရန်အတွက် ပြည်သူများ၏ အဆောက်အအုံများ၊ အရပ်ဘက်အဆောက်အအုံများကို အသုံးပြုမှုများ၊ လူသားတံတိုင်းအဖြစ် အသုံးပြုနိုင်ရန်အတွက် ယာယီနေရပ်စွန့်ခွာသူများကို မြို့၊ ရွာများမှာ ပြန်လည်နေထိုင်ရန်ဆွဲဆောင် စည်းရုံးမှုများ လုပ်ဆောင်လျက်ရှိသည်။
ထို့ကြောင့် နိုင်ငံတော်အကြီးအကဲအနေဖြင့် ‘‘လက်နက်ကိုင် အကြမ်းဖက်သောင်းကျန်းသူများ အနေဖြင့် ၎င်းတို့အဓမ္မဝင်ရောက် နေထိုင်နေသည့် မြို့၊ ရွာများ၌ တပ်မတော်၏ တန်ပြန်ထိုးစစ်ဆင်မှုများကို ကာကွယ်ရန်အတွက် ပြည်သူတို့၏ နေအိမ်အဆောက်အဦများ၊ အရပ်ဘက်အုပ်ချုပ်မှုဆိုင်ရာ အဆောက် အဦများကို အသုံးပြုခြင်း၊ အပြစ်မဲ့ပြည်သူလူထုကို လူသားတံတိုင်းအဖြစ် အသုံးပြုနိုင်ရေး ယာယီနေရပ် စွန့်ခွာနေရသူများကို ပြန်လည်နေထိုင်ရန် ဆွဲဆောင်စည်းရုံးခြင်း၊ အတင်းအဓမ္မလူသစ် စုဆောင်းခြင်းများကို လုပ်ဆောင်လျက်ရှိကြောင်း၊ တပ်မတော်အနေဖြင့် နိုင်ငံတော်၏ အချုပ်အခြာအာဏာကို မဖြစ်မနေကာ ကွယ်စောင့်ရှောက်သွားမည်ဖြစ်ပြီး အဆိုပါလက်နက်ကိုင် အကြမ်းဖက်သောင်းကျန်းသူများ၏ သတင်းရရှိမှုနှင့် အခြေအနေအရပ်ရပ်အပေါ် မူတည်၍ လိုအပ်သလို တုံ့ပြန်ဆောင်ရွက်သွားမည်ဖြစ်သဖြင့် ၎င်းတို့ အဓမ္မဝင်ရောက် နေထိုင်လျက်ရှိသည့်မြို့၊ ရွာများရှိ ပြည်သူများအနေဖြင့် ၎င်းတို့၏ အသုံးချမှုမခံရစေရေး နှင့်ဘေးကင်းလုံခြုံမှုရှိစေရေးတို့ အတွက် သတိပြုကြရန် လိုအပ်ကြောင်း’’ ပြောကြားထားပါသည်။
နိုင်ငံတော်နှင့် တပ်မတော်က နိုင်ငံတော်၏ အချုပ်အခြာအာဏာကို ထိပါးလာမှုနှင့် အကြမ်းဖက်မှုများ ကိုမလွဲမသွေ တုံ့ပြန်ဆောင်ရွက်သွားမှာ ဖြစ်သည့်အတွက် ပြည်သူများအနေနှင့် မြေစာပင်မဖြစ်ရအောင် သတိပေးခြင်းဖြစ်သည်။ အကြမ်းဖက်လုပ်ရပ်မှန်သမျှကို ပြည်သူတစ်ရပ်လုံးက ဆန့်ကျင်လျက်ရှိသည်။
နိုင်ငံတော်၏အချုပ်အခြာအာဏာ တည်တံ့ခိုင်မြဲမှုကို ထိပါးလာမှုများနှင့် အကြမ်းဖက်မှုများကို တုံ့ပြန်ဆောင်ရွက်ရာတွင် တပ်မတော် တစ်ရပ်တည်းသာမက နိုင်ငံချစ်စိတ်၊ မျိုးချစ်စိတ်နှင့် အမျိုးဘာသာ သာသနာကို ထိန်းသိမ်းကာကွယ် စောင့်ရှောက်လိုသည့်စိတ် ရှိကြသည့်ပြည်သူများကပါ အမျိုးသားရေး တာဝန်တစ်ရပ်အနေဖြင့် ပါဝင်ကြရမည်ဖြစ်သည်။
ယခုအချိန်တွင် တာဝန်သိပြည်သူများ အနေဖြင့် တပ်မတော်နှင့် လက်တွဲပြီးပြည်သူ့စစ်အဖွဲ့များတွင် ပါဝင်ထမ်းဆောင်မှုများ၊ ပြည်သူ့လုံခြုံရေး အဖွဲ့များတွင် ပါဝင်တာဝန် ထမ်းဆောင်လာမှုများမှာ နိုင်ငံတော် ကာကွယ်ခုခံပိုင်ခွင့်အတွက် အားတက်ဖွယ်မြင်ကွင်းများဖြစ်သည်။ ဖြစ်ပေါ်လာသည့် အခြေအနေများအရ နိုင်ငံတော်အတွက် စစ်မှုထမ်းခြင်းနှင့် အခြားသောလုံခြုံရေး အဖွဲ့အစည်းများမှာ ပါဝင်ခြင်းမှာ ပြည်သူများ၏ တာဝန်တစ်ခုအဖြစ် အရေးတကြီးတည်ရှိနေပြီဖြစ်သည်။ ပြည်ထောင်စုသမ္မတ မြန်မာနိုင်ငံတော်၏ လွတ်လပ်ရေး၊ အချုပ်အခြာအာဏာနှင့် နယ်မြေတည်တံ့ခိုင်မြဲရေးတို့ကို ကာကွယ်စောင့်ရှောက်ရေးမှာ နိုင်ငံသားတိုင်း၏ တာဝန်ဖြစ်သည်။နိုင်ငံသားတိုင်းစစ်ပညာ သင်ကြားရန်နှင့် နိုင်ငံတော် ကာကွယ်ရေးအတွက် စစ်မှုထမ်းဆောင်ရန်တာဝန်ရှိနေခြင်းမှာ ပြည်တွင်း၊ ပြည်ပရန်ဟူသမျှကို ကာကွယ်ရန် ဖြစ်သည်။ ပြည်သူလူထု၏ လူမှုစီးပွားဘဝလုံခြုံရေးအတွက် ပြည်ထောင်စုတစ်ဝန်းလုံး တည်ငြိမ်အေးချမ်းရေးနှင့် တရားဥပဒေစိုးမိုးရေး အပြည့်အဝရရှိစေရန် အလေးထား လုပ်ဆောင်လျက်ရှိသည်မှာ နိုင်ငံတော်၏ အနာဂတ်လမ်းခရီး သာယာဖြောင့်ဖြူးစေရေး အတွက် ကြိုးပမ်းနေခြင်းဖြစ်ပါကြောင်း ရေးသားလိုက်ရပေသည်။ ။