ရွှေတိဂုံစေတီတော်အား ရွှေသင်္ကန်းကပ်လှူပူဇော်ရန် ငြမ်းစေတီ တည်ဆောက်နေ
ရန်ကုန် စက်တင်ဘာ ၂၂
ရန်ကုန်မြို့ရှိ ရွှေတိဂုံစေတီတော်အား ရွှေသင်္ကန်းကပ်လှူပူဇော်ရန် ငြမ်းစေတီ တည်ဆောက်ခြင်းကို စက်တင်ဘာလ ၁၉ ရက်မှ စတင်ဆောင်ရွက်လျက်ရှိကြောင်း ရွှေတိဂုံစေတီတော် ဘဏ္ဍာထိန်းဂေါပကအဖွဲ့မှ သိရသည်။
ရွှေတိဂုံစေတီတော်အား ခေတ်အဆက်ဆက် ပြုပြင်ထိန်းသိမ်း စောင့်ရှောက်မှုများ ပြုလုပ်ခဲ့ကြပြီး ငါးနှစ်လျှင် တစ်ကြိမ် ရွှေသင်္ကန်းကပ်လှူ ပူဇော်လျက်ရှိသည်။
၂၀၁၈-၂၀၁၉ ခုနှစ်တွင် လုံးတော်ပြည့် ရွှေသင်္ကန်းကပ်လှူပူဇော်ခဲ့ပြီး ယခုနှစ်တွင် နိုင်ငံတော်စီမံအုပ်ချုပ်ရေး ကောင်စီ၏လမ်းညွှန်မှု၊ သာသနာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး၏ ဦးဆောင်ကွပ်ကဲမှုတို့ဖြင့် ရွှေတိဂုံစေတီတော်အား လုံးတော်ပြည့်ရွှေသင်္ကန်း ကပ်လှူပူဇော်မည်ဖြစ်ရာ ဝန်ကြီးဌာန၏ လုပ်ငန်းအဆင့်ဆင့် ဆောင်ရွက်နေမှုများတွင် ရန်ကုန်တိုင်းဒေသကြီး အစိုးရအဖွဲ့ကလည်း ပူးပေါင်းပါဝင် ဆောင်ရွက်လျက်ရှိသည်။
ရွှေသင်္ကန်းကပ်လှူပူဇော်ရန် နာယကအဖွဲ့၊ ဦးစီးကော်မတီ၊ လုပ်ငန်းကော်မတီနှင့် ဆပ်ကော်မတီ ၁၀ ခု ဖွဲ့စည်းထားပြီး လုပ်ငန်းတာဝန်အနေဖြင့် ဘာသာရေးဆိုင်ရာ လုပ်ထုံးလုပ်နည်းများ၊ ဒေသဆိုင်ရာ ဓလေ့ ထုံးတမ်းများနှင့်အညီ ဆောင်ရွက်မည်ဖြစ်ကြောင်း သိရသည်။
ရွှေတိဂုံစေတီတော်အား ရွှေသင်္ကန်း ကပ်လှူခြင်း လုပ်ငန်းဆောင်ရွက်ရန် ငြမ်းစေတီတည်ဆောက်ခြင်းကို ၂၀၂၄ ခုနှစ် စက်တင်ဘာလ တတိယပတ်မှ အောက်တိုဘာလ တတိယပတ်အထိလည်းကောင်း၊ ရွှေစင်ရွှေပြားများ ရောင်တော်ဖွင့်ခြင်းကို ၂၀၂၄ ခုနှစ် အောက်တိုဘာလ စတုတ္ထပတ်မှ ဒီဇင်ဘာလ ပထမပတ်အထိ လည်းကောင်း၊ ပျက်စီးရွှေပြားများ စာရင်းကောက်ယူခြင်းကို ၂၀၂၄ ခုနှစ် အောက်တိုဘာလ စတုတ္ထပတ်မှ ၂၀၂၅ ခုနှစ် ဇန်နဝါရီလ စတုတ္ထပတ်အထိ လည်းကောင်း၊ အလှူရှင်များက ရထားပျံဖြင့် ရွှေပြားလှူဒါန်းခြင်းနှင့် ပျက်စီးရွှေပြားများ လဲလှယ်ခြင်းကို ၂၀၂၄ ခုနှစ် နိုဝင်ဘာလ ပထမပတ်မှ ၂၀၂၅ ခုနှစ် မတ်လ ဒုတိယပတ်အထိ လည်းကောင်း၊ ရွှေချွတ်၊ ရွှေချလုပ်ငန်းများ ဆောင်ရွက်ခြင်းကို ၂၀၂၄ ခုနှစ် အောက်တိုဘာလ ဒုတိယပတ်မှ ၂၀၂၅ ခုနှစ် မတ်လ စတုတ္ထပတ်အထိ လည်းကောင်း၊ ငြမ်းဖျက်သိမ်းခြင်းကို ၂၀၂၅ ခုနှစ် မတ်လ ပထမပတ်မှ ဧပြီလ ပထမပတ်အထိလည်းကောင်း၊ ဗုဒ္ဓါဘိသေက အနေကဇာတင်ခြင်းနှင့် ရေစက်ချအခမ်းအနား ကျင်းပခြင်းကို ၂၀၂၅ ခုနှစ် မေလပထမပတ်တွင် လည်းကောင်း ဆောင်ရွက်နိုင်ရန် လျာထားကြောင်း သိရသည်။