ဇော်ဂျီမြစ်ပေါ်ရှိ မြို့ကြီး ရေလှောင်တမံနှင့် ရေလွှဲဆည်၊ ရေထိန်းဆည်များ ဒုတိယဝန်ကြီး ဦးဗိုလ်ဗိုလ်ကျော် ကွင်းဆင်းကြည့်ရှု စစ်ဆေး
နေပြည်တော် စက်တင်ဘာ ၂၂
စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော် သည် စက်တင်ဘာလ ၂၀ ရက် မွန်းလွဲပိုင်းက ရှမ်းပြည်နယ် ရွာငံမြို့နယ် မြို့ကြီးကျေးရွာအနီးရှိ မြို့ကြီးရေလှောင်တမံသို့ သွားရောက်ပြီး ရာဂိမုန်တိုင်း အကြွင်းအကျန် လေပွေလှိုင်းအရှိန်ဖြင့် မိုးသည်းထန်စွာ ရွာသွန်းမှုကြောင့် ရေလှောင်တမံအတွင်း ရေဝင်ရောက်မှု၊ တမံကြံ့ခိုင်မှုနှင့် ရေပိုလွှဲမှ ရေကျော်ကျခဲ့မှု အခြေအနေများကို ကြည့်ရှုစစ်ဆေးသည်။
ဆက်လက်၍ ဒုတိယဝန်ကြီးနှင့် အဖွဲ့သည် မြို့ကြီးရေလွှဲဆည်၏ အောက်ပိုင်း တူးမြောင်းပေါင် ကာကွယ်ထားသည့် ကျောက်ကြီးစီလိုင်နင် ရေတိုက်စားခဲ့မှု အခြေအနေကို လည်းကောင်း၊ တူးမြောင်းအတွင်း ရေကျော်ကျစီးဆင်းမှု မဖြစ်ပေါ်စေရေးအတွက် ရေလွှဲဆည်၏ လိုအပ်သည့် ရေကာနံရံအမြင့် ဆောင်ရွက်နိုင်ရေးနှင့် ရေတံခါး၊ ရေလွှဲဆည် ကြံ့ခိုင်မှုအခြေအနေများကို လည်းကောင်း၊ မန္တလေးတိုင်းဒေသကြီး ကျောက်ဆည်မြို့တွင်း ဇော်ဂျီမြစ်ပေါ်တွင် တည်ရှိသည့် မင်းရဲရေလွှဲဆည် ကြံ့ခိုင်မှုနှင့် ရေဖြတ်သန်းစီးဆင်းနေမှု အခြေအနေများကို လည်းကောင်း၊ ဇီးတောရေလွှဲဆည်၏ ရေတံခါးကြံ့ခိုင်မှု အခြေအနေများနှင့် ဇော်ဂျီရေထိန်းဆည် ရေဝင်ရောက်မှု အခြေအနေများကို လည်းကောင်း ကြည့်ရှုစစ်ဆေးပြီး ဆည်မြောင်းနှင့် ရေအသုံးချမှု စီမံခန့်ခွဲရေးဦးစီးဌာနမှ တာဝန်ရှိသူများ၏ လုပ်ငန်းဆိုင်ရာ ရှင်းလင်းတင်ပြချက်များ အပေါ် လိုအပ်ချက်များ ဆွေးနွေးမှာကြားသည်။
ဒုတိယဝန်ကြီးသည် စက်တင်ဘာလ ၂၁ ရက် နံနက်ပိုင်းတွင် မန္တလေးတိုင်းဒေသကြီး ဆည်မြောင်းနှင့် ရေအသုံးချမှု စီမံခန့်ခွဲရေး ဦးစီးဌာန ညွှန်ကြားရေးမှူးရုံး အစည်းအဝေးခန်းမ၌ တိုင်းဒေသကြီးအဆင့် လယ်ယာကဏ္ဍဆိုင်ရာ တာဝန်ရှိသူများနှင့် တွေ့ဆုံ၍ ရေကြီးရေလျှံမှုကြောင့် ပျက်စီးခဲ့သည့် စိုက်ပျိုးမြေများတွင် ရာသီချိန်အမီ စိုက်ပျိုးနိုင်ရေး၊ ပျက်စီးမှုမရှိသည့် မိုးစပါးစိုက်ပျိုးဧကများ စိုက်ပျိုးရေပေးဝေနိုင်ရေးနှင့် နွေစပါးစိုက်ဧက တိုးချဲ့နိုင်ရေးအတွက် ရေပိုမိုသိုလှောင်ထားရှိရေးဆိုင်ရာ ကိစ္စရပ်များ ဆွေးနွေးပြောကြားသည်။
ဆက်လက်၍ ဒုတိယဝန်ကြီးနှင့် တာဝန်ရှိသူများသည် မြစ်သားမြို့အနီး ပန်းလောင် မြစ်ပေါ်တွင် တည်ရှိသည့် စမာရေလွှဲဆည်အနီး ရေတိုက်စားမှုကြောင့် မြေသားဖြင့် ကာကွယ်ထားသည့် ရေတားတာပေါင် ပြုပြင်ဆောင်ရွက်နေမှုကို ကွင်းဆင်းစစ်ဆေးခဲ့ကြောင်း သိရသည်။