ငှက်အော်စမ်းလူငယ် သင်တန်းကျောင်းနှင့် အမျိုးသမီးများ ပြုစုစောင့်ရှောက်ရေးနှင့် ဖွံ့ဖြိုးတိုးတက်ရေးဌာန (တွံတေး)တို့ကို ပြည်ထောင်စုဝန်ကြီး ဒေါက်တာစိုးဝင်း ကြည့်ရှုစစ်ဆေး
နေပြည်တော် ဧပြီ ၂၉
လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာ စိုးဝင်းသည် လူမှုဝန်ထမ်းဦးစီးဌာနနှင့် ဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာနတို့မှ တာဝန်ရှိသူများနှင့်အတူ ယနေ့နံနက်ပိုင်းတွင် ကော့မှူးမြို့နယ် ငှက်အော်စမ်းကျေးရွာရှိ လူမှုဝန်ထမ်းဦးစီးဌာန ငှက်အော်စမ်း လူငယ်သင်တန်းကျောင်းသို့ သွားရောက်ပြီး ဝန်ထမ်းများနှင့်တွေ့ဆုံ၍ သင်တန်းကျောင်းတွင် နေထိုင်စဉ်ကာလအတွင်း သင်တန်းသားလူငယ်များ ဘက်စုံဖွံ့ဖြိုးတိုးတက်မှုရှိစေရေးအတွက် လူမှုဝန်ထမ်း နည်းလမ်းများဖြင့် ပံ့ပိုးပေးနိုင်ရေး၊ ဂေဟာ/သင်တန်းကျောင်းများတွင် အနိမ့်ဆုံးရှိရမည့် ပြုစုစောင့်ရှောက်ခြင်းနှင့် အကာအကွယ်ပေးခြင်းဆိုင်ရာ စံချိန်စံညွှန်းများ ပြည့်ဝစွာ ပံ့ပိုး ဆောင်ရွက် ပေးနိုင်ရေး အလေးထားဆောင်ရွက်ရန်တို့ကို မှာကြားသည်။
ယင်းနောက် ပြည်ထောင်စုဝန်ကြီးနှင့်အဖွဲ့သည် ကျောင်းစာကြည့်တိုက်၊ သင်တန်း သားလူငယ်များနေထိုင်သည့် အိပ်ဆောင်များ၊ စားရိပ်သာများနှင့်သန့်စင်ခန်းများကို ကြည့်ရှုစစ်ဆေးပြီး လိုအပ်သည်များ မှာကြားဖြည့်ဆည်း ဆောင်ရွက်ပေးသည်။
ထို့နောက် ပြည်ထောင်စုဝန်ကြီးနှင့် အဖွဲ့သည် သင်တန်းသားများ လက်တွေ့သင်ကြား လေ့ကျင့်နေသော သက်မွေးပညာသင်တန်းများ ဖြစ်သည့် ဆံသသင်တန်း၊ ဆိုင်ကယ်ပြင်သင်တန်း၊ ဆပ်ပြာဆီထုတ်လုပ်မှု သင်တန်းနှင့် သံဂဟေဆက်သင်တန်း (ဝရိန်သင်တန်း)များကို ကြည့်ရှုစစ်ဆေးပြီး သင်တန်းကျောင်းတွင် ခေတ်ပေါ်တေးဂီတ တီးဝိုင်းတည်ထောင်နိုင်ရေးအတွက် လူငယ်များကို လေ့ကျင့်သင်ကြားပေးနေမှုများကို ကြည့်ရှုအားပေးသည်။ ယင်းနောက် ကျောင်းဝင်းအတွင်းရှိ ဘောလုံးကွင်းနှင့် ဘော်လီဘောကွင်းများတွင် လူငယ်များလေ့ကျင့် သင်ကြားနေမှုများကို ကြည့်ရှုအားပေး၍ နိုင်ငံ့ဂုဏ်ဆောင် အားကစားသမားများ ဖြစ်သည်အထိ ကြိုးစားလေ့ကျင့်ကြရန် မှာကြားသည်။
ဆက်လက်၍ ပြည်ထောင်စုဝန်ကြီးက ကျောင်းရှိ အားကစားခန်းမတွင် သင်တန်းသားလူငယ်များနှင့်တွေ့ဆုံ၍ လူငယ်များသည် နိုင်ငံတော်၏ အရေးကြီးဆုံး အရင်းအမြစ်ဖြစ်ကြောင်း၊ အကျင့်စာရိတ္တကောင်းမွန်ပြီး မိမိတို့၏ မိသားစု၊ ပတ်ဝန်းကျင်နှင့် နိုင်ငံတော်က အားကိုးအားထားပြုရသည့် လူတော်လူကောင်းများဖြစ်စေရေး အတိတ်သင်ခန်းစာများရယူ၍ ကျင့်ကြံကြိုးပမ်း ဆောင်ရွက်ကြစေလိုကြောင်း မှာကြားသည်။ အဆိုပါ သင်တန်းကျောင်းတွင် ကာကွယ်စောင့်ရှောက်ရန် လိုအပ်သော ကလေး ၅၉ ဦးနှင့် ထိန်းသိမ်းစောင့်ရှောက်ရန် လိုအပ်သော ကလေး ၅၇၅ ဦး စုစုပေါင်း ၆၃၄ ဦးကို လက်ခံစောင့်ရှောက်ထားရှိသည်။
ထို့နောက် ပြည်ထောင်စုဝန်ကြီးနှင့် အဖွဲ့သည် တွံတေးမြို့ရှိ အမျိုးသမီးများပြုစု စောင့်ရှောက်ရေးနှင့် ဖွံ့ဖြိုးတိုးတက်ရေးဌာနသို့ ရောက်ရှိရာ ကျောင်းအုပ်က ကလေးသူငယ်အခွင့်အရေးများ ဆိုင်ရာဥပဒေ(၂၀၁၉)အရ ထိန်းသိမ်းစောင့်ရှောက်ရန် လိုအပ်သည်များကို ရှင်းလင်းတင်ပြရာ ပြည်ထောင်စုဝန်ကြီးက နိုင်ငံ့ဝန်ထမ်းဥပဒေ၊ နည်းဥပဒေ၊ စည်းမျဉ်းစည်းကမ်းများနှင့်အညီ ဝန်ထမ်းများ အချင်းချင်း စည်းလုံးညီညွတ်စွာ ဆောင်ရွက် ကြရန်နှင့် ဌာနတွင်စောင့်ရှောက်ထားသော ကလေးများကို လူမှုပတ်ဝန်းကျင်အတွင်း ပြန်လည်ဝင်ဆံ့ရန် ဘက်ပေါင်းစုံမှစေတနာထား၍ လေ့ကျင့်သင်ကြားပေးရန်၊ ကျန်းမာရေးဆိုင်ရာ အသိပညာဗဟုသုတများကိုလည်း သက်ဆိုင်ရာကဏ္ဍအလိုက် ပညာရှင်များ ဖိတ်ခေါ်၍ အသိပညာပေးခြင်းများ ဆောင်ရွက်ပေးရန်နှင့် ၎င်းတို့နေရပ်ပြန်ပါက ပြန်လည်အသုံးချနိုင်မည့် ထိရောက်သည့် အသက်မွေးဝမ်းကျောင်းပညာရပ်များလည်း သင်ကြားပေးရန် မှာကြားသည်။
ယင်းနောက် ပြည်ထောင်စုဝန်ကြီးနှင့်အဖွဲ့သည် ဌာနရှိဆေးပေးခန်း၊ ကျောင်းသူအိပ်ဆောင်များ၊ ရာသီသီးနှံစိုက်ခင်းများနှင့် စားရိပ်သာတို့ကို လှည့်လည်ကြည့်ရှုပြီး လိုအပ်သည်များကို မှာကြားဖြည့်ဆည်း
ဆောင်ရွက်ပေးခဲ့ကြောင်း သိရသည်။