ပင်လယ်ထဲမှာ ဘယ်တော့မှမမှောက်မယ့်မီးသတ်လှေ

ပင်လယ်ထဲမှာ ဘယ်တော့မှမမှောက်မယ့်မီးသတ်လှေ

လှေမှန်ရင် ရေထဲမှာ မှောက်ရပါမယ်။ မမှောက်ဘူးဆိုရင်   လှေမဟုတ်ဘူးလို့ ပြောစမှတ်ရှိကြတယ်။ ဒါဆိုရင် လှေတော့လှေပဲ၊   မမှောက်တဲ့လှေရှိတယ်ဆိုရင်ယုံမလား။

တစ်ခါတလေမှာ  သင်္ဘောတစ်စင်းက မှောက်လို့ပဲဖြစ်ဖြစ်၊    မီးလောင်လို့ပဲ ဖြစ်ဖြစ်၊    စက်ချွတ်ယွင်းလို့ပဲ ဖြစ်ဖြစ် အကူအညီလိုနေမယ် ဆိုကြပါစို့။ အဲဒီလှေဆီကိုသွားပြီး   အကူအညီပေးမယ့်လှေကလည်း    လမ်းမှာမှောက်သွားတယ် ဆိုကြပါစို့။

ဒီအခြေအနေက  တော်တော်လေးကို ကိုးရိုးကားရားနိုင်မယ့်  အနေအထားဖြစ်မှာပါ။ ကူညီပေးမယ့်လှေက ကူကယ်ရာမဲ့ဘဝကို     ရောက်သွားတာတွေလည်း ကြုံဖူးကြမှာပါ။

အခုတော့ ဖြစ်လာနိုင်တဲ့ ဒီလိုဒုက္ခတွေကနေ ကင်းဝေးရပါပြီ။ အကြောင်းရင်းကတော့   ဟောင်ကောင် မီးသတ်တပ်ဖွဲ့က အမေရိကန်ဒေါ်လာ ၁၆ သန်းအသုံးပြုပြီး မီးသတ်ကယ်ဆယ်ရေးလှေတစ်စင်းကို ဖန်တီးလိုက်လို့ပါပဲ။

အဲဒီလှေက သာမန်လှေမဟုတ်ပါဘူး။ မတော်တဆတစ်ခုခုကြောင့်   မှောက်သွားတယ်ဆိုရင်တောင်မှ အများဆုံး ခြောက်စက္ကန့်အတွင်းမှာ သူ့အလိုလို ပြန်တည့်မတ်နိုင်ပါတယ်။

ဒါ့အပြင်  ဒီလှေဟာ   သူ့အလိုလိုပြန်တည့်မတ်နိုင်တဲ့   ကမ္ဘာ့အကြီးဆုံးလှေဖြစ်နေပါတယ်။ အဲဒီလှေကို   ထိုင်ဝမ်အခြေစိုက်   လန်းတက်သင်္ဘောကျင်းက တည်ဆောက်ထားတာဖြစ်ပြီး အဓိကအားဖြင့် ရေကြောင်း ရှာဖွေကယ်ဆယ်ရေး လုပ်ငန်းတွေမှာ အသုံးပြုဖို့အတွက် ရည်ရွယ်ထားတယ်လို့ ဆိုပါတယ်။

လက်ရှိမှာတော့    အဲဒီသင်္ဘောက ဟောင်ကောင်ကို   မရောက်သေးပါဘူး။

ထိုင်ဝမ်သင်္ဘောကျင်းမှာပဲရှိပါသေးတယ်။

ဟောင်ကောင်ကို   ဇွန်လအစောပိုင်းလောက်မှရောက်မှာပါ။

အတိုင်းအတာအားဖြင့် အလျား ၃၀ မှ ၃၉ မီတာ၊ အလေးချိန်အားဖြင့် တန် ၂၀၀ ခန့်ရှိပါတယ်။ လတ်တလော လက်တွေ့စမ်းသပ်မှုတွေမှာတော့ အဲဒီမီးသတ်လှေက သူ့အလိုလို   အောင်မြင်စွာပြန်တည့်မတ်နိုင်တာကို တွေ့ရပါတယ်။

ဒီလိုမျိုးစွမ်းဆောင်ရည်တွေရှိထားတဲ့ မီးသတ်ကယ်ဆယ်ရေး  လှေတစ်စင်းက ကယ်ဆယ်ရေးတပ်ဖွဲ့ဝင်တွေကို  သာမက ကယ်ဆယ်ခံရမယ့်သူတွေအတွက်လည်း တော်တော်လေးကို အားတက်စေမှာတော့အမှန်ပဲ ဖြစ်ပါတယ်။         

                           Ref:IE