MNL ပြိုင်ပွဲတွင် မဟာယူနိုက်တက်အသင်း နိုင်ပွဲပြန်ရပြီး ရတနာပုံအသင်း နိုင်ပွဲဆက်

Submitted by admin_webportal on Sat, 01/25/2025 - 09:46

ရန်ကုန် ဇန်နဝါရီ ၂၄

၂၀၂၄-၂၀၂၅ ရာသီ MNL အမှတ်ပေးပြိုင်ပွဲ ပွဲစဉ်(၁၇) ပထမနေ့ကို ယနေ့တွင်ကျင်းပရာ မဟာယူနိုက်တက်အသင်း နိုင်ပွဲပြန်ရပြီး ရတနာပုံအသင်း နိုင်ပွဲဆက်ခဲ့သည်။

YUSC ကွင်း၌ကျင်းပသည့်ပွဲတွင် မဟာ ယူနိုက်တက်အသင်းက အား/ကာသိပ္ပံ အသင်းကို ၂ ဂိုး ၁ ဂိုးဖြင့် အနိုင်ရခဲ့သည်။ အား/ကာသိပ္ပံအသင်းသည် နည်းပြသစ် ဦးသာကျော်လက်ထက် ပထမဆုံးရှုံးပွဲ နှင့်ရင်ဆိုင်ခဲ့ရပြီး ထိပ်ဆုံးအသင်းများနှင့် အမှတ်ကွာဟမှုမလျှော့ချနိုင်သလို အဆင့် ၅ နေရာအတွက် ရတနာပုံနှင့် မဟာယူနိုက်တက်အသင်းတို့၏ ဖိအားပေးခြင်းခံခဲ့ရသည်။ မဟာယူနိုက်တက်အသင်းသည် တောင်ပံတိုက်စစ်ကစားသမားကျော်စွာမင်း၏ဂိုးဖြင့် နိုင်ပွဲပြန်ယူနိုင်ခဲ့သည်။

နှစ်သင်းစလုံး အမာခံကစားသမား အများစုဖြင့် ပွဲထွက်လာပြီး ပွဲအစ ၄ မိနစ် မှာပင် အား/ကာသိပ္ပံအသင်းမှ စိုးလင်းအောင် ကိုယ့်ဂိုးကိုယ်သွင်းမိသဖြင့် မဟာယူနိုက်တက်အသင်း ဦးဆောင်ဂိုးရခဲ့သည်။ အား/ကာသိပ္ပံအသင်းသည် ချေပဂိုးရရန် တောက်လျှောက်ကြိုးပမ်းလာသော်လည်း ၆၁ မိနစ်မှ ဂိုးပြန်ရခဲ့ပြီး သန်းတိုးအောင်က သွင်းယူခဲ့ခြင်းဖြစ်သည်။ သို့သော် ၇၈ မိနစ်တွင် ကျော်စွာမင်းက မဟာယူနိုက်တက်အသင်းအတွက် အနိုင်ဂိုးသွင်းယူခဲ့သည်။ ယခုပွဲအတွက် အကောင်းဆုံးဆုကို မဟာယူနိုက်တက်အသင်းမှ ကျော်စွာမင်းကရရှိသည်။ ယခုပွဲအပြီးတွင် အား/ကာသိပ္ပံအသင်းက ၂၇ မှတ်၊ မဟာယူနိုက်တက်အသင်းက ၂၃ မှတ် ရရှိထားသည်။

သုဝဏ္ဏကွင်း၌ ကျင်းပသည့်ပွဲတွင် ရတနာပုံအသင်းက ဧရာဝတီယူနိုက်တက်အသင်းကို ၃ ဂိုး-၁ ဂိုးဖြင့် အနိုင်ရခဲ့သည်။ ရတနာပုံအသင်းသည် နိုင်ပွဲဆက်ခဲ့ပြီး အဆင့် ၅ နေရာမှ အား/ကာသိပ္ပံအသင်းကို နှစ်မှတ်အကွာဖြင့် ဖိအားပေးနိုင်ခဲ့သည်။ ရတနာပုံအသင်းအတွက် ဂိုးများကို ၄ မိနစ်တွင် စခန့်ချော၊ ၄၁ မိနစ်တွင် ပြည်မိုး၊ ၉၀+၂ မိနစ်တွင် ကြည်စိုးတို့က သွင်းယူခဲ့ပြီး ဧရာဝတီအသင်းအတွက် ချေပဂိုးတစ်ဂိုးကို ၉၀+၃ မိနစ်တွင် ညီညီအောင်က သွင်းယူခဲ့သည်။

ယခုပွဲအတွက် အကောင်းဆုံးဆုကို ရတနာပုံတိုက်စစ်မှူး ပြည်မိုးကရရှိသည်။ ယခုပွဲအပြီးတွင် ရတနာပုံအသင်းက ၂၅ မှတ်၊ ဧရာဝတီယူနိုက်တက်အသင်းက၁၁ မှတ်ရရှိထားသည်။

ပွဲစဉ် (၁၇) ဒုတိယနေ့ကို ဇန်နဝါရီလ ၂၅ ရက် (ယနေ့) သုဝဏ္ဏကွင်း၌ ဆက်လက်ကျင်းပမည်ဖြစ်ပြီး ရခိုင်ယူနိုက်တက်အသင်းနှင့် ရန်ကုန်ယူနိုက်တက်အသင်း တို့ယှဉ်ပြိုင်ကစားကြမည်ဖြစ်သည်။

သတင်း-ရဲရင့်လွင်

ဓာတ်ပုံ-MNL

အားကစား