မိတ္ထီလာတက္ကသိုလ်၌ ဘာသာရပ်ပေါင်းစုံ အမျိုးသား၊ အမျိုးသမီးဘော်လီဘောပြိုင်ပွဲကျင်းပ
မိတ္ထီလာ ဇန်နဝါရီ ၂၇
မန္တလေးတိုင်းဒေသကြီး မိတ္ထီလာမြို့ရှိမိတ္ထီလာတက္ကသိုလ်၏ မိုးလုံလေလုံအားကစားခန်းမ၌ ၂ဝ၂၄-၂ဝ၂၅ ပညာသင်နှစ် ဘာသာရပ်ပေါင်းစုံ အမျိုးသား၊အမျိုးသမီးဘော်လီဘောပြိုင်ပွဲ ဖွင့်ပွဲအခမ်းအနားကို ဇန်နဝါရီလ ၂၇ ရက်နံနက်ပိုင်းတွင်ကျင်းပကြောင်း သိရသည်။
ဖွင့်ပွဲအခမ်းအနားတွင် ပါမောက္ခချုပ်ဒေါက်တာဘဟန်က အမှာစကားပြောကြားသည်။ ဆက်လက်၍ အမျိုးသားဘော်လီဘောပြိုင်ပွဲကိုကျင်းပရာ ရူပဗေဒအသင်းနှင့်ဝိဇ္ဇာညွန့်ပေါင်းအသင်းတို့၏ ယှဉ်ပြိုင်ကစားမှုကို ပါမောက္ခချုပ် ဒေါက်တာဘဟန်၊ ဒုတိယပါမောက္ခချုပ် ဒေါက်တာကျော်လင်းနှင့်တာဝန်ရှိသူများ၊ ဆရာ၊ဆရာမများ၊ ကျောင်းသား၊ ကျောင်းသူများက ကြည့်ရှုအားပေးသည်။
အဆိုပါ အမျိုးသား၊ အမျိုးသမီးဘော်လီဘောပြိုင်ပွဲတွင် အမျိုးသားအသင်းကိုးသင်းနှင့်အမျိုးသမီးအသင်းကိုးသင်းပါဝင်ယှဉ်ပြိုင်ကစားကြမည်ဖြစ်ပြီး ပြိုင်ပွဲကိုဇန်နဝါရီလ၃ဝ ရက်အထိ ကျင်းပသွားမည်ဖြစ်ကြောင်းသိရသည်။