(၇၈)နှစ်မြောက် ပြည်ထောင်စုနေ့ အထိမ်းအမှတ်အကြို ဖူဆယ်ပြိုင်ပွဲ ကျင်းပလျက်ရှိ
ဟိုပုံး ဖေဖော်ဝါရီ ၈
ရှမ်းပြည်နယ်(တောင်ပိုင်း) ပအိုဝ်းကိုယ်ပိုင် အုပ်ချုပ်ခွင့်ရဒေသ ဟိုပုံးမြို့နယ်၌ (၇၈) နှစ်မြောက် ပြည်ထောင်စုနေ့ အထိမ်းအမှတ်အကြို ဖူဆယ်ပြိုင်ပွဲကို ဖေဖော်ဝါရီလ ၈ ရက်မှစ၍ မြို့ဦး ကွက်သစ်ရပ်ကွက်ရှိ ဖူဆယ်အားကစားကွင်း၌ ကျင်းပလျက်ရှိသည်။
အဆိုပါဖူဆယ်ပြိုင်ပွဲကို ဖေဖော်ဝါရီလ ၈ ရက်မှ ၁၂ ရက်အထိ ကျင်းပလျက်ရှိပြီး စုစုပေါင်းအသင်း ၁၁ သင်းပါဝင်ယှဉ်ပြိုင်ကြသည်။ ယင်းပြိုင်ပွဲ၌ အုပ်စုအဆင့်တွင် ခုနစ်ပွဲကျင်းပမည်ဖြစ်ပြီး တစ်ပွဲလျှင် တစ်ပိုင်း မိနစ် ၂၀ နှုန်းဖြင့် မိနစ် ၄၀ ကြာမြင့်ကာ အသင်းတစ်သင်းလျှင် အားကစားသမား ငါးဦးနှုန်းဖြင့် ယှဉ်ပြိုင်ကြခြင်းဖြစ်သည်။
ဖေဖော်ဝါရီလ ၈ ရက်နှင့် ၉ ရက်တို့တွင် အုပ်စုအဆင့်၊ ဖေဖော်ဝါရီလ ၁၀ ရက်တွင် ကွာတားဖိုင်နယ်အဆင့်၊ ဖေဖော်ဝါရီလ ၁၁ ရက်တွင် ဆီမီးဖိုင်နယ်အဆင့်နှင့် ဖေဖော်ဝါရီလ ၁၂ ရက်တွင် ဗိုလ်လုပွဲ ကျင်းပမည်ဖြစ်သည်။
ထို့ပြင် ဖေဖော်ဝါရီလ ၉ ရက်မှ ၁၂ ရက် အထိ ပအိုဝ်းကိုယ်ပိုင် အုပ်ချုပ်ခွင့်ရဒေသဝင်း အတွင်းရှိ ပိုက်ကျော်ခြင်းကွင်း၌ ပိုက်ကျော်ခြင်း အားကစားပြိုင်ပွဲကို လည်းကောင်း၊ ဖေဖော်ဝါရီလ ၉ ရက်မှ ၁၁ ရက်အထိ သီရိမင်္ဂလာရွှေချမ်းသာ မွေတော်ဘုရားရှေ့ရှိ ကျောက်တိုင်ကွင်း၌ ဘော်လီဘောအားကစားပြိုင်ပွဲကို လည်းကောင်း ကျင်းပမည်ဖြစ်ကြောင်း သိရသည်။