ငလျင်ဘေးဒဏ်သင့်ဒေသများ ပြန်လည်ထူထောင်ရေး ရုပ်ရှင်၊ သဘင်၊ ဂီတရန်ပုံငွေ ပဒေသာကပွဲဖျော်ဖြေမှု ဒုတိယနေ့ ကြည့်ရှုအားပေးသူများဖြင့် စည်ကား

ငလျင်ဘေးဒဏ်သင့်ဒေသများ ပြန်လည်ထူထောင်ရေး ရုပ်ရှင်၊ သဘင်၊ ဂီတရန်ပုံငွေ ပဒေသာကပွဲဖျော်ဖြေမှု ဒုတိယနေ့ ကြည့်ရှုအားပေးသူများဖြင့် စည်ကား

ရန်ကုန်    မေ    ၁၁

      မြန်မာနိုင်ငံတွင်  ကြုံတွေ့ခဲ့ရသည့် မန္တလေးငလျင်ကြောင့် ငလျင်ဘေးဒဏ်သင့် ဒေသများ ပြန်လည်ထူထောင်ရေး ရုပ်ရှင်၊ သဘင်၊ ဂီတရန်ပုံငွေ ပဒေသာကပွဲ ဖျော်ဖြေမှုဒုတိယနေ့ အစီအစဉ်အဖြစ် ရန်ကုန်မြို့ အမျိုးသားကဇာတ်ရုံကြီးတွင် ဆက်လက် ဖျော်ဖြေတင်ဆက်ရာ ရန်ကုန်တိုင်းဒေသကြီးဝန်ကြီးချုပ် ဦးစိုးသိန်း၊ ရန်ကုန်တိုင်းဒေသကြီး အစိုးရအဖွဲ့ဝန်ကြီးများ၊ ဖိတ်ကြားထားသော ဧည့်သည်တော်များ တက်ရောက်ကြပြီး    ကြည့်ရှုအားပေးသူများဖြင့် စည်ကားခဲ့သည်။

မြန်မာနိုင်ငံဂီတအစည်းအရုံးမှ ယနေ့ဖျော်ဖြေတင်ဆက်မှုတွင်  မြန်မာနိုင်ငံ၌ ဖြစ်ပွားခဲ့သော  ငလျင်လှုပ်ခတ်မှုဖြစ်စဉ်၊ ကူညီကယ်ဆယ်ရေး၊ ထောက်ပံ့ကူညီမှုနှင့် ပြန်လည်ထူထောင်ရေး မှတ်တမ်းဗီဒီယိုကို ပြသပြီး  ထိုဖြစ်စဉ်တွင် ထိခိုက်သေဆုံးခဲ့သူများအား ဝမ်းနည်းခြင်း အထိမ်းအမှတ်အဖြစ် တစ်မိနစ်ငြိမ်သက်၍ ဆုတောင်းမေတ္တာပို့သသည်။

ထို့နောက် ငလျင်ဘေးဒဏ်သင့်ဒေသများ ပြန်လည်ထူထောင်ရေး ရန်ပုံငွေအဖြစ် ရန်ကုန်တိုင်းဒေသကြီးအစိုးရ အဖွဲ့နှင့် စေတနာရှင် အလှူရှင်များလှူဒါန်းသော အလှူငွေများအား  မြန်မာနိုင်ငံဂီတ အစည်းအရုံးဥက္ကဋ္ဌ ဦးလွင်မြင့် ထံ ပေးအပ်လှူဒါန်းသည်။

ယင်းနောက် ဖျော်ဖြေရေးအစီအစဉ်တွင် Plus Three Band Immortal Band ပူးပေါင်းတင်ဆက်မှုဖြင့်   ပူစူး၊  ဆိုင်စံ၊ မီးနို၊ ဘိုဘိုဟန်၊  ခင်မောင်ထူး၊ နွဲ့ယဉ်ဝင်း၊ နီနီခင်ဇော်၊  လွှမ်းပိုင်၊  စိုင်းစိုင်းခမ်းလှိုင်၊ မျိုးကျော့မြိုင်၊ မေခလာ၊ ဟဲလေး၊ အိုင်းရင်းဇင်မာမြင့်၊ ကိုင်ဇာ၊ စည်သူလွင်၊ ချမ်း‌မြေ့မောင်ချို၊ ဇော်ပိုင်၊ အယ်လ်ဆိုင်းဇီနှင့် ဝေလတို့က မြူးကြွသွက်လက်သော တေးသီချင်းများဖြင့် ဖျော်ဖြေတင်ဆက်ခဲ့ရာ ကြည့်ရှုအားပေး ကြသည့်ပရိသတ်များက တေးသီချင်းနှင့်အတူ စီးမျောလိုက်ပါ သီဆိုခြင်းဖြင့် ဂီတ‌ဖျော်ဖြေပွဲသည် အထူး စည်ကားခဲ့သည်။