နေပြည်တော် မတ် ၁၉
ရန်ကုန်-ပြည် ရထားလမ်းပိုင်းရှိ ရန်ကုန်တိုင်းဒေသကြီး မှော်ဘီမြို့နယ်၌ မတ် ၁၄ ရက်တွင် လှော်ကားဘူတာနှင့် မှော်ဘီဘူတာကြား မိုင်တိုင် (၁၈/၁၄-၁၅) အတွင်းရှိ ၃၉ ပေအရှည် သံလမ်းတစ်ချောင်းအား မသမာသူများမှဖြုတ်၍ ဖယ်ရှားထားကြောင်း သိရှိရသဖြင့် အငယ်တန်း အင်ဂျင်နီယာ(၃) သံလမ်းနှင့် ဝန်ထမ်းအင်အား ခြောက်ဦးတို့ဖြင့် သွားရောက်ပြုပြင်ခဲ့ရာ မတ် ၁၄ ရက် နံနက် ၁၀ နာရီတွင် ပြုပြင်ပြီးစီးခဲ့သည်။
ထိုနည်းတူ ရန်ကုန်-မန္တလေးရထားလမ်းပိုင်းရှိ သင်္ဃန်းကျွန်းမြို့နယ်အနီး၌ မတ်၁၇ ရက် နံနက် ၁၀ နာရီတွင် မသမာသူအကြမ်းဖက်သမားများက သံလမ်းများ ဖြုတ်ယူမှုဖြစ်ပွားခဲ့သည်။
အဆိုပါဖြစ်စဉ်တွင် မတ် ၁၇ ရက် နံနက် ၁၀ နာရီ မိနစ် ၂၀ ခန့်တွင် Honda Fit အနက်ရောင် ယာဉ်အမှတ် YGN 2F-3959 ဖြင့် သင်္ဃန်းကျွန်းမြို့နယ် (က)ရပ်ကွက်ဘက်မှ စီးနင်းလာသော မသမာသူလူငါးဦးသည် ဆယ်ပေါင်တူများ၊ ခွများနှင့်အတူ (ခ)ရပ်ကွက် ဇဝနဘက်ခြမ်းမှ ခြေကျင်လျှောက်လာသော မသမာသူလူငါးဦး၊ စုစုပေါင်း ၁၀ ဦးတို့သည် သင်္ဃန်းကျွန်းမြို့နယ် အဝေရာလမ်း ရထားလမ်းဆုံ Level Crossing အနီးတွင် ကြိုတင်ချိန်းဆို တွေ့ဆုံပြီးနောက် အဆိုပါ နေရာအနီးရှိ ရန်ကုန်-မန္တလေး ရထားသံလမ်းအား ဖြုတ်သွားခဲ့ကြောင်း မွန်းလွဲ ၂ နာရီခွဲတွင် သိရှိရသည်။
အထက်ပါ ကိစ္စနှင့်ပတ်သက်၍ ညနေ ၃ နာရီတွင် မြန်မာ့မီးရထားမှ တာဝန်ရှိသူများနှင့်အတူ ရထားရဲတပ်ဖွဲ့မှ တာဝန်ရှိသူများက သွားရောက်စစ်ဆေးခဲ့ရာ ရန်ကုန်-မန္တလေးရထားလမ်း၊ နှင်းဆီကုန်း-သင်္ဃန်းကျွန်းဘူတာကြား မိုင်တိုင်အမှတ်(၄/၂၀)နေရာတွင် အဆန်ရထားလမ်း ၃၉ ပေအရှည် ရထားသံလမ်းတစ်ဆက် ဖြုတ်ထားခြင်း၊ အစုန်ရထားလမ်း ၃၉ ပေအရှည် ရထားသံလမ်းတစ်ဆက် ကွန်ကရစ်ဇလီဖားတုံးမှ သံလမ်းထိန်းကလစ် ဖြုတ်ထားခြင်းတို့ကို စစ်ဆေးတွေ့ရှိခဲ့သည်။
အဆိုပါ ရထားလမ်းပျက်စီးမှုများအား ပြုပြင်ရန်အတွက် သင်္ဃန်းကျွန်းမြို့နယ် မိုင်တိုင်အမှတ်(၄/၃-၄)တွင် မြန်မာ့မီးရထားမှ တိုင်းတာဝန်ခံဦးစီး၍ အငယ်တန်းအင်ဂျင်နီယာ(၁)နှင့် သံလမ်းပြုပြင်ရေး လုပ်သား ၁၅ ဦးနှင့် ရထားရဲတပ်ဖွဲ့ဝင်များ လိုက်ပါပြီး မတ် ၁၈ ရက် နံနက် ၁၀ နာရီ ၄၅ မိနစ်တွင် ပြုပြင်ပြီးစီးခဲ့သည်။ ရထားလမ်း၊ သံလမ်းပျက်စီးမှုနှင့် ပတ်သက်၍ မတ် ၁၇ ရက်တွင် သင်္ဃန်းကျွန်းရဲစခန်း၌ (ပ) (၁/၂၀၂၁) ရထားပို့ဆောင်ရေး ဥပဒေပုဒ်မ (၈၄) ဖြင့် အမှုဖွင့်လှစ်ထားရှိပြီး ဖြစ်ကြောင်း သိရသည်။
မြန်မာ့မီးရထား