အယ်ဒီတာ့အာဘော်

မြန်မာနိုင်ငံအတွင်းနေထိုင်လျက်ရှိကြသော ရဟန်းရှင်လူပြည်သူအများစုသည် မိမိတို့နေထိုင်သော နိုင်ငံကြီး အေးချမ်းသာယာခေတ်မီဖွံ့ဖြိုးတိုးတက်နေသည်ကိုသာ တွေ့မြင်လိုကြသည်။ စည်းလုံး ညီညွတ်ခြင်းဖြင့် နိုင်ငံတော်ကိုတည်ဆောက်လိုကြသည်။ အလုပ်အကိုင်အခွင့်အလမ်းများပေါများပြီး အခြားသောပြည်ပနိုင်ငံများကပင် မိမိနိုင်ငံအတွင်းသို့လာရောက်အလုပ်လုပ်ကြသည်အထိ ဖြစ်စေချင် သည်။ စက်မှုဖွံ့ဖြိုးတိုးတက်ပြီး မော်တော်ကားထုတ်လုပ်သည့်စက်ရုံ၊ လေယာဉ်ပျံထုတ်လုပ်သည့်စက်ရုံ စသည်ဖြင့် စက်ရုံများအပြိုင်အဆိုင်ရှိစေချင်သည်။

မြန်မာတို့၏ဆယ့်နှစ်လရာသီတွင် ပြာသိုလမှာ ညတာအရှည်ဆုံးလဖြစ်သည်။ အအေးဓာတ်လွှမ်းခြုံမှု အများဆုံးလလည်းဖြစ်ပေရာ လူသားတို့အတွက် သာသာယာယာရှိလှသည်။ ကြက်သီးတဖြန်းဖြန်း ထလောက်အောင်အေးလှသော ပြာသိုလ၏ရာသီအမည်မှာ မကာရရာသီဖြစ်သည်။ မကာရသည် ပါဠိစကား မကန်းငါးကိုခေါ်ဆိုခြင်းဖြစ်သည်။ ရာသီရုပ်မှာ သမင်မျက်နှာရှိသော မကန်းငါးရုပ် သဏ္ဌာန်ဖြစ်လေသည်။ စာသံပေသံနှင့်ဆိုရသော် ကောင်းကင်တွင်လမင်းသည် ဖုသျှနက္ခတ်နှင့် ယှဉ်၍ လပြည့်ပြီး ဥတ္တရာသာဠ်နက္ခတ်နှင့်နေမင်းတို့ယှဉ်ကြကာ ပုစွန်တာရာထွန်းလင်းသော ရာသီဟု ရေးဖွဲ့ကြသည်။

မန်လည်ဆရာတော်ကြီးက “အဝတ်ပုဆိုး၊ တန်ဆာမျိုးကား၊ တိုး၍တိုး၍၊ တစ်နေ့တစ်ခါ၊ လဲပါတုံရှောင်း၊ သစ်တိုင်းကောင်း၏၊ အပေါင်းအဖော်၊ ဟုတုံသော်မူ၊ ငယ်ဖော်ငယ်ပေါင်း၊ ဟောင်းတိုင်းကောင်း၏၊ အဝတ်ပုဆိုး၊ တန်ဆာမျိုးကား၊ သစ်တိုင်းကောင်း၏”ဟူ၍ ဖွဲ့ဆိုထားသည်။ အဝတ်အစားမှာ သစ်တိုင်းကောင်းလှသော်လည်း မိတ်ဆွေမူကား မိတ်ဟောင်းဆွေဟောင်းသည် အကောင်းဆုံးဟု ဆိုလိုရင်းဖြစ်သည်။ မိတ်ဆွေဟုဆိုရာတွင် ငယ်ပေါင်းကြီးဖော်များကို ရောင်းရင်းဟုဆိုကြသည်။ အသက်အရွယ်ရကာ တွေ့ကြုံဆက်ဆံရသူကိုရိုးရင်းဟုဆိုပေသည်။

ချစ်စရာကရင်နှစ်သစ်ကူးနေ့မှသည်