စီးပွားရေး

ရန်ကုန်   ဇွန်   ၁ဝ

ပြည်တွင်း၌ စားသုံးဆီဖူလုံရေး အတွက် ပြည်ပမှ ဃသကိူ  ဏသငညအ  ၈  အဆင့်ရှိ စားအုန်းဆီတန်ချိန် ခုနစ်သိန်းခန့် နှစ်စဉ် တင်သွင်းနေရပြီး ပြည်တွင်းဈေးကွက်သို့ ဖြန့်ဖြူးရာတွင် ကျန်းမာရေးနှင့် ညီညွတ်မှုရှိစေရေး  ဆောင်ရွက်လျက်ရှိကြောင်း စီးပွားရေးနှင့်   ကူးသန်းရောင်းဝယ်ရေး ဝန်ကြီးဌာန   စားသုံးသူရေးရာ ဦးစီးဌာန စားသုံးသူတင်သွင်းမှု ကြီးကြပ်ရေးကော်မတီမှ တာဝန်ရှိသူတစ်ဦး၏ ပြောဆိုချက်အရ သိရသည်။

ပြည်တွင်းမှ    စိုက်ပျိုးထွက်ရှိသည့် အရည်အသွေးမြင့် စိန်တစ်လုံး သရက်သီးများကို တရုတ်နိုင်ငံသို့  တင်ပို့လျက်ရှိရာ ဈေးကောင်း ရရှိနေကြောင်း မြန်မာ့သရက်ဈေးကွက်နှင့် နည်းပညာဖွံ့ဖြိုး တိုးတက်ရေး အသင်း အထွေထွေ အတွင်းရေးမှူး ဦးကျော်စိုးနိုင်၏ ပြောပြချက်အရ သိရသည်။

လက်ရှိတွင် မြေပြန့်ဒေသများ၌ စိန်တစ်လုံး သရက်သီးထွက်ရှိသည့် ရာသီချိန် ပြီးဆုံးပြီဖြစ်သော်လည်း   စစ်ကိုင်းတိုင်း ဒေသကြီးအထက်ပိုင်း၊ ရှမ်းပြည်နယ်နှင့် ကချင်ပြည်နယ်တို့မှ စိန်တစ်လုံးသရက်သီးများ ထွက်ရှိနေခြင်းဖြစ်သည်။

စစ်ကိုင်းတိုင်းဒေသကြီး ကင်းမြင်သာအုပ်စု  ခပ်ချိုကျေးရွာရှိ ဒေသခံများအနေဖြင့် ဝါးနှီးခမောက်များ ရက်လုပ်ခြင်းလုပ်ငန်းကို    တစ်နှစ်ပတ်လုံး တွင်တွင်ကျယ်ကျယ် လုပ်ကိုင်၍ အပိုဝင်ငွေ ရရှိလျက်ရှိကြောင်း သိရသည်။

ရန်ကုန်မြို့ရှိ   ဗဟိုစံပြ ငါးဈေးကြီးနှင့် ရွှေပိတောက်ငါးဈေးတို့၌  မိုးဦးကျ ကာလ ရေချိုရေထွက်ကုန်မျိုးစုံ ဈေးကွက် ပိုမိုနေရာယူလာကြောင်း    မြန်မာနိုင်ငံ ငါးလုပ်ငန်းအဖွဲ့ချုပ်မှ   တာဝန်ရှိသူတစ်ဦး၏ ပြောဆိုချက်အရ သိရသည်။

အဆိုပါငါးဈေးများသို့ မွေးမြူရေးကန်များနှင့် မြစ်ချောင်း၊ အင်းအိုင်တို့မှ ရေထွက် ကုန်များ နေ့စဉ်ဝင်ရောက်လျက်ရှိပြီး ယခု မိုးရာသီတွင် ပင်လယ်ပြင် ငါးဖမ်းရာသီရပ်နားသည့်အတွက် ရေချိုရေထွက်ကုန် မျိုးစုံဈေးကွက်ပိုမို နေရာယူလာခြင်းဖြစ်သည်။

ရန်ကုန်မြို့ရှိ ဘုရင့်နောင်ကုန်စည်ဒိုင်သို့ ကြက်သွန်နီ အဝင်ပုံမှန်ရှိနေပြီး ဈေးကွက်အတွင်း  အရောင်းအဝယ်အေးနေကြောင်း  ဘုရင့်နောင်ကုန်စည်ဒိုင်မှ သိရသည်။

ဇွန် ၇ ရက်တွင် ဘုရင့်နောင်ကုန်စည်ဒိုင်သို့ နယ်စုံမှ ကြက်သွန်နီကား အစီးရေ ၃ဝ ဝင်ရောက်ပြီး ကြက်သွန်နီတစ်ပိဿာလျှင် ငွေကျပ် ၂ဝဝ မှ ၃၇၅ ကျပ်အထိ ဈေးနှုန်း ရှိကြောင်း သိရသည်။

ရှမ်းပြည်နယ်(မြောက်ပိုင်း) လားရှိုးမြို့ဈေးအသီးသီးရှိ ဝက်သားအရောင်းဆိုင်များနှင့် ငါးအရောင်းဆိုင်များမှ ရောင်းချလျက်ရှိသော ဝက်သားနှင့်ငါးများတွင် ရောဂါပိုးတွေ့ရှိသည်ဟု ဆိုသောကြောင့် ဝယ်ယူစားသုံးမှုလျော့နည်းသွားကြောင်း သိရသည်။

ပဲခူးတိုင်းဒေသကြီး  ကျောက်ကြီးမြို့နယ်၌  ယခုနှစ်မိုးရာသီတွင်  အိမ်တွင်း လက်မှုလုပ်ငန်းဖြစ်သော  အလှဆောင်း ဝါးခမောက်များ ရောင်းအားကောင်းနေပြီး ဈေးကောင်း ရရှိကြောင်း သိရသည်။

သို့ရာတွင်    ဝါးခမောက်ပြုလုပ်ရာ၌ အဓိက အသုံးပြုရသော   ကုန်ကြမ်းပစ္စည်းတချို့ ဈေးနှုန်းမြင့်တက်လျက် ရှိကြောင်း သိရသည်။

ပွင့်လင်းရာသီတွင် ပဲခူးတိုင်းဒေသကြီး ကျောက်ကြီးမြို့နယ်ရှိ ရှင်သီဝလိခြေတော်ရာ စေတီ၊ စပ်လဲရေတံခွန် စသည့်အထင်ကရနေရာများသို့ ခရီးသွားများ လာရောက် လည်ပတ်ကြပြီး အလှဆောင်း ဝါးခမောက်များ ဝယ်ယူကြသဖြင့် ရောင်းအားကောင်းလေ့ရှိသည်။

ကရင်ပြည်နယ်   ကော့ကရိတ်ခရိုင် ကြာအင်းဆိပ်ကြီးမြို့နယ်၌  သံပရာပင်များ စိုက်ပျိုးအောင်မြင် ဖြစ်ထွန်းလျက်ရှိပြီး နှစ်စဉ်သံပရာသီး များစွာထွက်ရှိကာ နွေရာသီကာလတွင်  သံပရာသီး ဈေးနှုန်းကောင်းစွာ ရရှိသော်လည်း     ယခုအခါ ဈေးနှုန်း ကျဆင်းလျက်ရှိကြောင်း သိရသည်။

ယခင်နှစ်များက သံပရာသီးဈေးနှုန်းမှာ သံပရာသီးတစ်လုံးလျှင် ငွေကျပ် ၇ဝ မှ ၁ဝဝ အထိရရှိပြီး ယခုနှစ်တွင် သံပရာသီးတစ်လုံး ငွေ  ၅ဝ ကျပ်ခန့်သာရရှိ၍ ဈေးနှုန်းကျဆင်းမှုကြောင့်   သံပရာခြံ စိုက်ပျိုးတောင်သူများ အနေဖြင့်  ခူးဆွတ်ရောင်းချမှု နည်းပါးလာသည်။

ရှမ်းပြည်နယ်(မြောက်ပိုင်း)လားရှိုးမြို့တွင် ရောင်းချလျက်ရှိသော ခရမ်းချဉ်သီး များ   ယခုရက်ပိုင်းတွင် ဈေးထက်ဝက်နီးပါး မြင့်တက်လာကြောင်း အရောင်းအဝယ် လုပ်ကိုင်သူများထံမှသိရသည်။

COVID-19 ရောဂါကာလအတွင်း   စစ်ကိုင်းတိုင်းဒေသကြီး ယင်းမာပင်ခရိုင် ဆားလင်းကြီးမြို့နယ်၌ မိသားစု အပိုဝင်ငွေရရှိစေရေး ပင်ထောင်ခရမ်းချဉ်များ တစ်နိုင်တစ်ပိုင်စိုက်ပျိုးကြသူ  များလာကြောင်း သိရသည်။

အဆိုပါဒေသ၌  ပင်ထောင်ခရမ်းချဉ် စိုက်ပျိုးသူများသည်  နှစ်စဉ် ခရမ်းချဉ်သီးများ ခူးဆွတ်ချိန်မှစ၍ နေ့စဉ်ရောင်းချရသဖြင့်  မိသားစု စားဝတ်နေရေးအတွက် အပိုဝင်ငွေ ရရှိသောကြောင့်   ယခုကဲ့သို့ ပင်ထောင်ခရမ်းချဉ်များ တစ်နိုင်တစ်ပိုင် စိုက်ပျိုးသူများလာခြင်းဖြစ်သည်။