ဒီမိုကရေစီရဲ့အနှစ်သာရမှာ တစ်ပါတီ၊ တစ်မျက်နှာအတွက်ဆောင်ရွက်ခြင်းမျိုးမဟုတ်ဘဲ အများဆန္ဒကို ဦးစားပေးဆောင်ရွက်ရန် ဖြစ်တယ်။ နိုင်ငံရေးဆိုင်ရာ ပြည်တွင်းပဋိပက္ခများကို ဖြေရှင်းရာမှာ ညှိနှိုင်းဆွေးနွေးခြင်းကသာ ကောင်းမွန်သော ရလဒ်များ ရရှိနိုင်မယ်။ ရုရှား-မြန်မာချစ်ကြည်ရေးက ၁၉၅၀-၁၉၆၀ ပြည့်နှစ်လောက်တည်းက ကောင်းမွန်စွာတည်ဆောက်ခဲ့ပြီး လက်ရှိအခြေအနေထိလည်း အထူးကောင်းမွန်ကြောင်းကို တွေ့ရှိရပါတယ်။ အဲဒီအချိန်တုန်းက ဆိုဗီယက်ပြည်ထောင်စုက အင်ဂျင်နီယာတွေက မြန်မာနိုင်ငံမှာ မြန်မာ့စီးပွားရေးကို ပြန်လည်ထူထောင်ရေးလုပ်ငန်းတွေမှာ အလုပ်လုပ်ကူညီ ဆောင်ရွက်ပေးခဲ့တာတွေ ရှိပါတယ်။
ရန်ကုန်မှာ ရန်ကုန်နည်းပညာတက္ကသိုလ်၊ အင်းယားလိတ်ဟိုတယ်၊ တောင်ကြီးစဝ်စံထွန်းဆေးရုံ စတာတွေ တည်ဆောက်ပေးခဲ့တယ်။ မြန်မာနိုင်ငံရဲ့သာယာလှပတဲ့ ရှုခင်းတွေနဲ့ သန့်ရှင်းလှပတဲ့ ကမ်းခြေတွေဟာ ရုရှားနိုင်ငံက ခရီးသွားဧည့်သည်တွေကို ဆွဲဆောင်မှုရှိပါတယ်။ ဒါပေမဲ့ မြန်မာနိုင်ငံကို လာရောက်လည်ပတ် ဖို့အတွက် ရုရှားနိုင်ငံသားများအနေနဲ့ ဗီဇာလိုအပ်ခြင်း၊ မြန်မာနိုင်ငံသို့တိုက်ရိုက်လေယာဉ်မရှိခြင်း အခက် အခဲတွေနဲ့ကြုံနေရပါတယ်။ ရုရှား-မြန်မာနှစ်နိုင်ငံအကြား လူသားချင်းစာနာထောက်ထားမှုဆိုင်ရာ ပူးပေါင်းဆောင်ရွက်မှု လုပ်ငန်းများကို ပိုမိုလုပ်ဆောင်ရန် လိုအပ်ပါတယ်။ ရန်ကုန်မြို့မှာ Russian Center for Science and Culture ကို ဖွင့်လှစ်သွားဖို့ စီစဉ်ထားရှိပါတယ်။ ဒီလိုမျိုးဖွင့်လှစ်ခြင်းဖြင့် ရုရှားနိုင်ငံရဲ့ နည်းပညာများနဲ့ယဉ်ကျေးမှုများကို မြန်မာနိုင်ငံသားများ လေ့လာခွင့်ရရှိမှာ ဖြစ်ပါတယ်။ မြန်မာ လူမျိုးများအကြား ရုရှားဘာသာစကားနှင့် ရုရှားနိုင်ငံ၏ယဉ်ကျေးမှုများကို လေ့လာသိရှိခွင့်ရရှိပြီး မြန်မာနိုင်ငံမှ ကျောင်းသားများ၊ ဘွဲ့လွန်ကျောင်းသားများ ရုရှားကို လာရောက်ပညာသင်ကြားရန် အခွင့်အရေးလည်း ပိုမိုရရှိလာမှာ ဖြစ်ပါတယ်။
ရုရှားခရီးသွားတွေကို အဓိက ဆွဲဆောင်စေတာကတော့ ဗုဒ္ဓရဲ့ငြိမ်းချမ်းတဲ့ တရားဓမ္မများ ဖြစ်ပါတယ်။ ရုရှားနိုင်ငံမှာ ရှိတဲ့ ဗုဒ္ဓဘာသာဝင်တွေဟာ ကွဲပြားမှု ရှိသော်လည်း တရားရှုမှတ်ခြင်းမှာတော့ တူညီကြပါတယ်လို့ ထင်ပါတယ်။ ရုရှားနိုင်ငံမှာ သတ်မှတ်ထားတဲ့ ဘာသာကြီးလေးခုမှာ ဗုဒ္ဓဘာသာ ပါဝင်ပါတယ်။ အနောက်နိုင်ငံတွေနဲ့ ကမ္ဘာ့သတင်းမီဒီယာများက မြန်မာနိုင်ငံနဲ့ပတ်သက်ပြီး အပုပ်ချရေးသားမှုများ၊ မမှန်ကန်သော သတင်းများနှင့် မြန်မာနိုင်ငံအတွင်း ပြဿနာများဖြစ်စေရန် တက်ကြွစွာ လှုံ့ဆော်မှုများ ရှိနေပါတယ်။ ဒါ့ကြောင့် ရုရှားနိုင်ငံသားများအတွက် မြန်မာနိုင်ငံဟာ ခရီးသွားဖို့ လုံခြုံမှု မရှိဘူးလို့ ထင်ကြတယ်။
အမှန်တကယ်တော့ သူတို့ထင်တာ မဟုတ်ဘူး ဆိုတာမျိုးကိုလည်း ရုရှားနိုင်ငံသားတွေကို ပြချင်တယ်။
မြန်မာလူမျိုးတွေရဲ့ ရိုးသားပွင့်လင်းပြီး ရင်းနှီးဖော်ရွေမှု တွေကိုလည်း ပြချင်တယ်။ ဒါကြောင့် သမိုင်းအစဉ်အလာနဲ့ ယဉ်ကျေးမှု မြင့်မားတဲ့ ကျွန်မတို့ နှစ်နိုင်ငံအနေနဲ့ ပူးပေါင်းလုပ်ဆောင်နိုင်တာတွေ အများကြီးရှိပါတယ်။ ကျွန်မအနေနဲ့ ရုရှား-မြန်မာ နှစ်နိုင်ငံပူးပေါင်းဆောင်ရွက်မှုတွေက ဒီထက်မက ပိုမိုတိုးတက်လာပြီး ပူးပေါင်းဆောင်ရွက်မှုကြောင့် ရရှိလာတဲ့ အသီးအပွင့်တွေကို နှစ်နိုင်ငံစားရမယ်လို့ အကြွင်းမဲ့ယုံကြည်ပါတယ်။
ဤသည်မှာ ရုရှားဖက်ဒရေးရှင်းနိုင်ငံ MGIMO တက္ကသိုလ်မှ မြန်မာ့ရေးရာ ကျွမ်းကျင်ပညာရှင်တွဲဖက်ပါမောက္ခ Mrs.Kseniya Alexandrovna Efremova က မြန်မာနိုင်ငံ၏ တိုးတက်ပြောင်းလဲမှုများနှင့် ပတ်သက်၍ မေးမြန်းမှုများကို ဖြေကြားထားသော အကြောင်းအရာအချို့ကို ကောက်နုတ်ထားခြင်း ဖြစ်သည်။
အဆိုပါ မြန်မာ့ရေးရာကျွမ်းကျင်ပညာရှင် တွဲဖက်ပါမောက္ခ Mrs.Kseniya Alexandrovna Efremova သည် မြန်မာဘာသာစကားနှင့် မြန်မာ့ယဉ်ကျေးမှုကို ၁၉၉၄ ခုနှစ်မှ စတင်သင်ကြားလေ့လာခဲ့သူဖြစ်သည်။ မြန်မာစကားကိုလည်း ကျွမ်းကျင်စွာ ပြောဆိုနိုင်သည်။
မြန်မာနိုင်ငံအနေဖြင့် ကမ္ဘာ့နိုင်ငံအားလုံးနှင့် ချစ်ကြည်ရင်းနှီးစွာ ဆက်ဆံလျက်ရှိသည်။ မြန်မာတို့ဘက်က မိတ်ဝတ်မပျက် ကောင်းကောင်းမွန်မွန် ဆက်ဆံနေသော်လည်း အချို့သော နိုင်ငံများက မလိုတစ်မျိုး လိုတစ်မျိုးဆက်ဆံရေးမျိုးကို ကျင့်သုံးကြသည်။ အထူးသဖြင့် အနောက်နိုင်ငံအချို့၏ ဆက်ဆံရေးသည် ထိုသို့သော အနေအထားဖြစ်သည်။ နှစ်ပေါင်းကြာရှည်စွာ မြန်မာနိုင်ငံနှင့် မြန်မာနိုင်ငံသားအပေါ် ထာဝရမိတ်ဆွေ၊ အရင်းနှီးဆုံးမိတ်ဆွေစိတ်ထားဖြင့် ဆက်ဆံသော နိုင်ငံများတွင် ရုရှားနိုင်ငံသည် ထိပ်ဆုံးမှပါဝင်သည်။ အပွင့်လင်းဆုံး ဆိုရလျှင် ရုရှားဖက်ဒရေးရှင်း နိုင်ငံသည် ယခင်ဆိုဗီယက် ပြည်ထောင်စုနိုင်ငံဖြစ်ခဲ့သည်မှ ယနေ့တိုင် မြန်မာနိုင်ငံအတွက် ကောင်းကျိုးများကိုသာ သယ်ပိုးပေးလျက် ရှိသည်။ ရုရှားဖက်ဒရေးရှင်းနိုင်ငံကို ခေါင်းဆောင်သူတို့တွင် ကောင်းသောစိတ်ထားမှာ သူတစ်ပါးနိုင်ငံများ၏ ပြည်တွင်းရေးကို ပျက်စီးစေရန် ဝင်ရောက်စွက်ဖက်မှု ကင်းရှင်းခြင်းဖြစ်သည်။ ရုရှား-မြန်မာဆက်ဆံရေး သမိုင်းလမ်းကြောင်းကို ပြန်လည်ကြည့်မည် ဆိုလျှင်လည်း ပန်းခင်းသော လမ်းသာဖြစ်ကြောင်း ရေးသား လိုက်ရပေသည်။ ။