လူသားအားလုံးအတွက် ဂရုဓမ္မ
တော်သလင်းလသည် မိုးရွာနေပူသည့်ကြားမှ ခြေခင်းလက်ခင်းသာယာသည်ဟုဆိုရမည်။ မြစ်ချောင်း အင်းအိုင်များတွင် ရေတဖွေးဖွေးမှာ လှေကလေးတွေပြိုင်ကာ လှော်ခဲ့ကြသည်။ လှေလှော်ပြိုင်ပွဲသည် မြန်မာတို့နှင့် အကျွမ်းတဝင် ရှိခဲ့သည့်အတွက် မျက်မှောက်ခေတ်လှေလှော် အားကစားတွင် မြန်မာတို့၏ လှေလှော်အဆင့်မှာ မြင့်မားလျက်ရှိသည်ဟုဆိုနိုင်သည်။ မြန်မာတို့သည် ဆယ့်နှစ်လရာသီပွဲတော်များကို လများအလိုက် ကျင်းပကြသည်။ တန်ခူးလတွင် သင်္ကြန်ပွဲတော်ကျင်းပသကဲ့သို့ တော်သလင်းလတွင် လှေသဘင်ပွဲ ကျင်းပခဲ့ကြသည်။ ဗုဒ္ဓဘာသာနှင့်သက်ဆိုင်သောအခါတော်နေ့များတွင် နှစ်ဆန်းတစ်ရက်နေ့ကို မင်္ဂလာအခါတော်နေ့ဟု သတ်မှတ်သကဲ့သို့ တော်သလင်းလပြည့်နေ့တွင် ဂရုဓမ္မအခါတော်နေ့ကျင်းပကြသည်။ ထိုနေ့များတွင် ဗုဒ္ဓဘာသာဝင်တို့သည် ရှစ်ပါးသီလ၊ ကိုးပါးသီလဆောက်တည်ကြပြီး ဥပုသ်သီတင်း စောင့်ထိန်းကြသည်။
ငါးပါးသီလသည် ဗုဒ္ဓဘာသာဝင်သူတော်စင်တို့နှင့် ရင်းနှီးကျွမ်းဝင်ပြီး ဖြစ်သည်။ ပါဏာတိပါတ- သူ့အသက်ကိုသတ်ခြင်းမှ၊ ဝေရမဏိသိက္ခာပဒ- ရှောင်ကြဉ်ရာရှောင်ကြဉ်ကြောင်းဖြစ်သော သိက္ခာပုဒ်ကို၊ သမာဒိယတိ-ဆောက်တည်ပါ၏။ အဒိန္နာဒါန-ပိုင်ရှင်သည် ကိုယ်နှုတ်တို့ဖြင့် မပေးအပ်သောသူတစ်ပါး ဥစ္စာကိုယူငင်ခြင်းမှ၊ ဝေရမဏိသိက္ခာပဒ-ရှောင်ကြဉ်ရာရှောင်ကြဉ်ကြောင်း ဖြစ်သောသိက္ခာပုဒ်ကို၊ သမာဒိယတိ- ဆောက်တည်ပါ၏။ ကာမေသုမိစ္ဆာစာရ-ကာမဂုဏ်တို့၌မှားယွင်းစွာကျင့်ခြင်းမှ၊ ဝေရမဏိ သိက္ခာပဒ-ရှောင်ကြဉ်ရာရှောင်ကြဉ်ကြောင်း ဖြစ်သော သိက္ခာပုဒ်ကို၊ သမာဒိယတိ-ဆောက်တည်ပါ၏။ မုသာဝါဒ- မဟုတ်မမှန်ပြောဆိုခြင်းမှ၊ ဝေရမဏိသိက္ခာပဒ- ရှောင်ကြဉ်ရာရှောင်ကြဉ်ကြောင်းဖြစ်သော သိက္ခာပုဒ်ကို၊ သမာဒိယတိ-ဆောက်တည်ပါ၏။သုရာမေရယ မဇ္ဇပ္ပမာဒဋ္ဌာနာ-မူးယစ်မေ့လျော့စေတတ် သောသေရည်သေရက် စသည်တို့ကို သောက်စားသုံးစွဲခြင်းမှ၊ ဝေရမဏိသိက္ခာပဒ- ရှောင်ကြဉ်ရာရှောင်ကြဉ်ကြောင်း ဖြစ်သော သိက္ခာပုဒ်ကို၊ သမာဒိယတိ- ဆောက်တည်ပါ၏။
ငါးပါးသီလကို စောင့်ထိန်းလိုက်နာကြပါကရရှိမည့် ကောင်းကျိုးတရားများကို ဇိနတ္ထပကာသနီကျမ်း တွင် ကျီးသဲလေးထပ် ဆရာတော်ကြီးက ရေးသားထားသည်မှာ ဤလောက၌သီလနှင့်ပြည့်စုံသောသူသည် အကြင်ကောင်းသော သီလ၌ လုံ့လပြုခြင်းတည်းဟူသောအကြောင်းကြောင့် များစွာသောလူအပေါင်းတို့ သည်အလိုလိုပင် ကြည်ညိုသဒ္ဓါ၍ ကြီးစွာသော စည်းစိမ်ချမ်းသာ လာဘ်ပူဇော်သက္ကာကိုလည်းရ၏။
ကောင်းမြတ်သော ကျေးဇူးသတင်းကျော်စောခြင်းသို့လည်း ရောက်၏။ အကြင်သို့သော မင်းပုဏ္ဏားသူဌေး သူယ်ပရိသတ်၊ ရဟန်းပရိသတ်တို့ကိုဆည်းကပ်ကုန်အံ့၊ ထိုသို့ဆည်းကပ်လေသမျှ၌ လှပတင့်တယ်စွာ သာယာသဖြင့်ဆည်းကပ်ရ၏။ ကြောက်လန့်ခြင်း မိန်းမောတွေဝေခြင်း ကင်းလျက်သာလျှင် သေလွန်စုတေရ၏။ ခန္ဓာပျက်သောအခါ၌လည်း နတ်ရွာသုဂတိဘဝသို့လားရရောက်ရ၏ ဟူ၍ဖြစ်သည်။
ကမ္ဘာတစ်ဝန်းတွင်လူသားတို့ လောဘတရားကြီးမားလွှမ်းမိုးလာသောအခါ ငတ်မွတ်ခေါင်းပါးသော ကပ်ဘေးဆိုက်ရောက်လာသည်။ ဒေါသတရားကြီးမားလွှမ်းမိုးလာသောအခါ လက်နက်ဘေးကပ်ဆိုက် ရောက်လာသည်။ မောဟတရားကြီးမားလွှမ်းမိုးလာသောအခါ ရောဂါဘေးကပ်ဆိုက်ရောက်လာသည်။
ဤသည်မှာကမ္ဘာတစ်ဝန်းတွင် မြင်တွေ့နေကြရသောဖြစ်ရပ်များဖြစ်သည်။ အကယ်၍သာ တိုင်းပြည် နိုင်ငံမှန်သမျှ၊ လူသားမှန်သမျှတို့သည် ငါးပါးသီလကို ကိုယ်စီစောင့်ထိန်း လိုက်နာကြမည်ဆိုလျှင် ဆိုးရွားလွန်းလှသော ကပ်ဘေးအပေါင်းမှ ကျော်လွှားနိုင်ကြမည် ဖြစ်သည်။
တော်သလင်းလပြည့်နေ့တွင် ဂရုဓမ္မအခါတော်နေ့ဖြစ်ပေါ်လာရခြင်းမှာလည်း မြတ်စွာဘုရားရှင် လက်ထက်တော်က ဖြစ်သည်။ မြတ်ဗုဒ္ဓဟောကြားသော တိကနိပါတ်ကုရုဓမ္မဇာတ်တော်၌ ကုရုတိုင်း ဣန္ဒ ပတ္တနနဂိုရ်ပြည်နှင့် ကာလိင်္ဂတိုင်း ဒန္တပူရပြည်ဟူ၍ နှစ်ပြည်ထောင်ရှိကြသည်။ ကုရုတိုင်း ဣန္ဒပတ္တနနဂိုရ်ပြည် သည်မိုးလေဝသမှန်ပြီး သာယာဝပြောသည်။ စိုက်ပျိုးမွေးမြူရေးကောင်းမွန်သည့်အတွက် ငတ်မွတ်ခေါင်းပါး ခြင်းကင်းသည်။ ကာလိင်္ဂတိုင်း ဒန္တပူရပြည်တွင်မိုးလေဝသမမှန်သဖြင့် ငတ်မွတ်ခေါင်းပါးခြင်းဒုဗ္ဘိက္ခန္တရ ကပ်ကျရောက်လျက်ရှိသည်။
ကာလိင်္ဂတိုင်း ဒန္တပူရပြည်တွင် ထိုသို့ကပ်ဘေးအပေါင်းမှလွတ်မြောက်ရန်အတွက်အမျိုးမျိုးသော နည်းလမ်းတို့ကို ရှာကြံသည်။ နောက်ဆုံးတွင် ကုရုတိုင်း ဣန္ဒပတ္တနနဂိုရ်ပြည်၌ ဘုရင်မင်းမြတ်မှစ၍ တိုင်းသူ ပြည်သားအားလုံး တို့သည် ငါးပါးသီလကို ခါးဝတ်ပုဆိုးကဲ့သို့ စောင့်ထိန်းသည့်နမူနာယူကာ လိုက်နာ ကျင့်ကြံကြသည်။ ကုရုတိုင်း ဣန္ဒပတ္တနနဂိုရ်ပြည့်ရှင်ကောရဗျမင်းကလည်း သူနှင့်ကုရုတိုင်းသားများ ကျင့်သုံးသော ဂရုဓမ္မငါးပါးသီလကို ရွှေပေလွှာ၌ရေးသားကာ ကာလိင်္ဂတိုင်းမှစေလွှတ်လိုက်သော ကိုယ်စားလှယ်တော်ကြီးများမှတစ်ဆင့် ဒန္တပူရပြည်ဘုရင်ထံ ပေးပို့လိုက်သည်။ ထိုအတိုင်းကျင့်သုံးသည့်အတွက် တိုင်းပြည်စည်ပင် သာယာဝ ပြောသွားသည်။
ငါးပါးသီလသည် ကိုယ်ချင်းစာတရားဟုပင်ဆိုနိုင်သည်။ မိမိမကြိုက်နှစ်သက်သော လုပ်ရပ်ကို သူတစ်ပါးအား လည်း လုပ်ဆောင်ခြင်း မပြုဘဲနေခြင်းသည် ကောင်းသော အမူအကျင့်ဖြစ်သည်။ ယနေ့တွင် ကျရောက်သော တော်သလင်းလပြည့် ဂရုဓမ္မအခါတော်နေ့တွင် လူသားအားလုံးသည် ဂရုဓမ္မကိုသိရှိ၍ လိုက်နာကျင့်ကြံနိုင် ကြပါစေကြောင်း ရေးသား လိုက်ရပေသည်။ ။