ပြည်ထောင်စုကြီး ထာဝရတည်တံ့ခိုင်မြဲရေး
အယ်ဒီတာ့အာဘော်
(၂၀၂၄ ခုနှစ်၊ ဖေဖော်ဝါရီ ၁၁ ရက်)
ပြည်ထောင်စုသမ္မတ မြန်မာနိုင်ငံတော် နိုင်ငံတော်၏ သမိုင်းကြောင်းတွင် နေ့ထူးနေ့မြတ်များအဖြစ် လွတ်လပ်ရေးနေ့၊ ပြည်ထောင်စုနေ့၊ တပ်မတော်နေ့၊ အမျိုးသားနေ့စသည်ဖြင့် ရှိကြသည်။ ထိုနေ့ထူးနေ့မြတ်များသည် တစ်ခုနှင့်တစ်ခု ပတ်သက်ဆက်နွှယ်လျက်ရှိသည်။ ပေါ်ပေါက်လာရခြင်း အကြောင်းရင်းမှာ တစ်ခုတည်းသာဖြစ်သည်။ ထိုအကြောင်းရင်းမှာ မြန်မာနိုင်ငံသည် ကိုလိုနီနိုင်ငံ အဖြစ်သို့ ကျရောက်သွားခဲ့သည့် အတွက် လွတ်လပ်ရေးပြန်လည် ရရှိရန်ကြိုးပမ်းခဲ့ရာမှ ပေါ်ပေါက်လာသည့် နေ့ထူးနေ့မြတ်များဖြစ်သည်။
ကိုလိုနီအစိုးရ၏ ပညာရေးကို ပထမဦးစွာဆန့်ကျင်သည့် ကျောင်းသားသပိတ် ပေါ်ပေါက်လာခြင်းမှ တစ်ဆင့် အမျိုးသားနေ့ ဖြစ်လာခဲ့သည်။ အမျိုးသားရေး နိုးကြားလာခြင်းနှင့်အတူ လူငယ်အများသည် မိမိတို့နိုင်ငံ လွတ်လပ်ရန်အတွက် တပ်မတော်တစ်ရပ်ဖြစ်ပေါ်ရေး ကြိုးပမ်းခဲ့ကြသည်။ တပ်မတော် ပေါ်ပေါက်လာခြင်းနှင့် အတူ နယ်ချဲ့တော်လှန်ရေးကို အောင်မြင်စွာ ဆင်နွှဲနိုင်ခဲ့ကြသည်။ နယ်ချဲ့တို့ဆုတ်ခွာ ထွက်ပြေးပြီးနောက် ဖက်ဆစ်ဂျပန်တို့အုပ်စိုးခြင်းကို ခံခဲ့ရပြန်သည်။ အဆိုပါဖက်ဆစ်စနစ်ကိုလည်း တပ်မတော်သည် ပြည်သူလူထုနှင့်လက်တွဲကာ တိုက်ပွဲဝင်ခဲ့သည်။ စတင်တိုက်ပွဲဝင်ခဲ့သည့်နေ့ကို တပ်မတော်နေ့အဖြစ် မော်ကွန်းရေးထိုးခဲ့သည်။
မြန်မာနိုင်ငံသို့ ပြန်လည်ရောက်ရှိလာသည့် နယ်ချဲ့တို့သည် မြန်မာတို့ကိုလွတ်လပ်ရေး မပေးလို၍ သွေးခွဲအုပ်ချုပ်မှု၊ နှောင့်ယှက်မှု အမျိုးမျိုးပေးခဲ့သည်။ လွတ်လပ်ရေးပေးခဲ့လျှင်သော်မှ တစ်နိုင်ငံလုံးကို ပေးချင်သည့် ဆန္ဒမရှိခဲ့ပေ။ ထို့ကြောင့် ဗိုလ်ချုပ်အောင်ဆန်းနှင့် တိုင်းရင်းသား ခေါင်းဆောင်တို့ ရှမ်းပြည်နယ်(တောင်ပိုင်း) ပင်လုံမြို့တွင် တွေ့ဆုံဆွေးနွေးညှိနှိုင်းကာ မြန်မာ့လွတ်လပ်ရေးကို အတူတကွရယူကြမည်ဟု သဘောတူညီခဲ့ကြသည်။ ထိုနေ့မှာ ၁၉၄၇ ခုနှစ် ဖေဖော်ဝါရီလ ၁၂ ရက်နေ့ဖြစ်သည်။ ထိုပင်လုံစာချုပ်ချုပ်ဆိုသော နေ့ကို ပြည်ထောင်စုနေ့အဖြစ် မော်ကွန်းတင်သတ်မှတ်ကာ နေ့ထူးနေ့မြတ်အဖြစ် အလေးအနက်ထားခဲ့သည်။
၂၀၂၄ ခုနှစ် ဖေဖော်ဝါရီလ ၁၂ ရက်နေ့မှာ (၇၇) နှစ်မြောက် ပြည်ထောင်စုနေ့ဖြစ်သည်။ ပြည်ထောင်စုနေ့သို့ ရောက်ရှိလေတိုင်း မြန်မာတိုင်းရင်းသား အပေါင်းတို့ ပျော်ရွှင်မဆုံးဖြစ်ကာ ပြည်ထောင်စုနေ့ အထိမ်းအမှတ်ပွဲကို စည်ကားသိုက်မြိုက်စွာ ကျင်းပခဲ့ကြသည်။ ၂၀၂၂ ခုနှစ်တွင် ကျရောက်ခဲ့သော (၇၅) နှစ်မြောက် စိန်ရတုပြည်ထောင်စုနေ့ အခမ်းအနားကို စိန်ရတုဂုဏ်ဒြပ်နှင့်အညီ အထူးစည်ကား များပြားလှပစွာ ကျင်းပခဲ့သည်ကို ပြည်သူတစ်ရပ်လုံးနှင့် နိုင်ငံတကာကပါ မြင်တွေ့ကြပြီးဖြစ်သည်။
နိုင်ငံတော်စီမံအုပ်ချုပ်ရေး ကောင်စီ၏ ဦးဆောင်မှုအောက်တွင် တိုင်းရင်းသား အားလုံးတို့ စည်းလုံးခြင်း၊ ညီညွတ်ခြင်း၊ တန်ဖိုးထားခြင်းများနှင့်အတူ တိုင်းရင်းသားစည်းလုံး ညီညွတ်မှုခိုင်မာလျက် ရှိကြောင်းကို အဆိုပါ စိန်ရတုပြည်ထောင်စုနေ့ မြင်ကွင်းများက သက်သေပြလျက်ရှိခဲ့သည်။ တိုင်းရင်းသား စည်းလုံးညီညွတ်မှု ထာဝစဉ်တည်တံ့ရေးနှင့် ပြည်ထောင်စုကြီးထာဝရ တည်တံ့ခိုင်မြဲရေးအတွက် ပြည်တွင်းအင်အားဖြင့် ကြိုးပမ်းတည်ဆောက် အောင်မြင်မှုကို ပြသနိုင်ခြင်းလည်းဖြစ်သည်။ တိုင်းရင်းသားလူမျိုးပေါင်း တစ်ရာကျော်နေထိုင်သည့် ပြည်ထောင်စုနိုင်ငံ တစ်ခုအတွက် တိုင်းရင်းသားစည်းလုံး ညီညွတ်မှု ထာဝစဉ်တည်တံ့ရေးမှာ မရှိမဖြစ် အရာဖြစ်သည်။
နိုင်ငံတော်စီမံအုပ်ချုပ်ရေး ကောင်စီသည် တိုင်းဒေသကြီးနှင့်ပြည်နယ်များ၊ ကိုယ်ပိုင်အုပ်ချုပ်ခွင့်ရ ဒေသနှင့် တိုင်းများအားလုံးဘက်စုံ ကဏ္ဍစုံဖွံ့ဖြိုးတိုးတက်ရေးကို ကြိုးပမ်းတည်ဆောက်လျက်ရှိသည်။ ဖွံ့ဖြိုးတိုးတက်မှုရှိနေမှလည်း တိုင်းရင်းသားတို့၏ လူမှုစီးပွားဘဝ မြင့်မားလာမည်။ လူမှုစီးပွားဘဝ မြင့်မားလာသည်နှင့်အမျှ စည်းလုံးခြင်း၊ ညီညွတ်ခြင်းတို့နှင့်အတူ တိုင်းပြည်သာယာဝပြော လာမည်ဖြစ်သည်။ အချို့သော တိုင်းရင်းသား ဒေသများတွင် လက်နက်ကိုင်ပဋိပက္ခများ ရှိနေခြင်းကြောင့် ဖွံ့ဖြိုးတိုးတက်မှု နှောင့်နှေးလျက်ရှိသည်။ ဤသည်ကိုလည်း နိုင်ငံတော်၏ အနှစ်သာရဖြစ်သော ပြည်တွင်းငြိမ်းချမ်းရေးနှင့် ရရှိထားသည့် ပြည်တွင်းငြိမ်းချမ်းရေး ရလဒ်များ တည်ငြိမ်မှုရှိစေရေးအတွက် NCA ပါ သဘောတူညီချက်များအတိုင်း ဖြစ်နိုင်သမျှ အလေးထား လုပ်ဆောင်လျက်ရှိပါသည်။
၂၀၂၄ ခုနှစ် (၇၇) နှစ်မြောက်ပြည်ထောင်စုနေ့ အမျိုးသားရေး ဦးတည်ချက်များတွင် “ပြည်ထောင်စုကြီးထာဝစဉ် တည်တံ့ခိုင်မြဲရေးအတွက် တိုင်းရင်းသားပြည်သူ အားလုံးက ပြည်ထောင်စုစိတ်ဓာတ်ဖြင့် ကာကွယ်စောင့်ရှောက်ရေး၊ တိုင်းပြည်တည်ငြိမ် အေးချမ်းရေးနှင့် တရားဥပဒေ စိုးမိုးရေးတို့ အပြည့်အဝရရှိစေရန်အတွက်နိုင်ငံတော်အစိုးရ၊ တပ်မတော်နှင့်ပြည်သူအတူတကွ လက်တွဲကြိုးပမ်းဆောင်ရွက်ရေး” ဟူသောဦးတည်ချက်နှစ်ရပ်ပါဝင်ပါသည်။ ယနေ့အချိန်တွင် ကမ္ဘာ့နိုင်ငံကြီး အချို့အနေဖြင့် နိုင်ငံငယ်များ၏ ပြည်တွင်းရေးကိစ္စများတွင် အကြောင်းအမျိုးမျိုးပြကာ ဝင်ရောက်စွက်ဖက်ပြီး တည်ငြိမ်မှုပျက်ပြားစေရန်၊ စည်းလုံးညီညွတ်မှုပြိုကွဲစေရန် နည်းလမ်းမျိုးစုံ အသုံးပြုဆောင်ရွက်လျက်ရှိသည်။ အဆိုပါနိုင်ငံကြီး များစွက်ဖက်မှုကြောင့် တည်ငြိမ်ပြီး ဖွံ့ဖြိုးတိုးတက်သွားသည့်နိုင်ငံဟူ၍ တစ်နိုင်ငံမျှမရှိသေးပေ။ ဤသည်ကို တိုင်းရင်းသားပြည်သူ တစ်ရပ်လုံးသိမြင်ကြပြီးဖြစ်ပေရာ ပြည်ထောင်စုကြီးထာဝရ တည်တံ့ခိုင်မြဲအောင် ပြည်တွင်းအင်အားဖြင့် ကြိုးပမ်းတည်ဆောက်ကြရမည်သာ ဖြစ်ပါကြောင်း ရေးသား လိုက်ရပေသည်။ ။