အယ်ဒီတာ့အာဘော်
(၂၀၂၄ ခုနှစ်၊ ဖေဖော်ဝါရီ ၁၃ ရက်)
ပြည်ထောင်စုကို တည်ထောင်ပြု
မိမိတို့၏ရှေးက ဘိုးဘေးဘီဘင်ဘောင်တို့ တည်ထောင်ပေးထားခဲ့သော မြန်မာနိုင်ငံကြီးကို မိမိတို့၏ နောင်လာနောက်သားမြေးမြစ်တီတွတ်ကျွတ်တိုင်အောင် တည်တံ့ခိုင်မြဲနေအောင် ထိန်းသိမ်းကာကွယ် စောင့်ရှောက်ကြရမည်ဖြစ်သည်။ မြန်မာနိုင်ငံတွင် ကချင်၊ ကယား၊ ကရင်၊ ချင်း၊ ဗမာ၊ မွန်၊ ရခိုင်၊ ရှမ်း စသောတိုင်းရင်းသားလူမျိုးတို့သည် ရှေးပဝေသဏီနှစ်ပေါင်းများစွာကတည်းက မြန်မာ့မြေ၊ မြန်မာ့ရေ၊ မြန်မာ့လေတွင် နေထိုင်ခဲ့ကြသူများ ဖြစ်ကြသည်။
ဆွေရင်းမျိုးချာဖြစ်ကြ၍ အေးအတူပူအမျှ ဥမကွဲသိုက်မပျက် ချစ်ချစ်ခင်ခင်နေထိုင်ခဲ့ ကြသူများ ဖြစ်ကြသည်။ တိုင်းရင်းသားလူမျိုးပေါင်းတစ်ရာကျော်ရှိသော မြန်မာနိုင်ငံအတွက် အရေးကြီးဆုံး အရာမှာ တိုင်းရင်းသား စည်းလုံးညီညွတ်ရေးဖြစ်သည်။ တိုင်းရင်းသား စည်းလုံးညီညွတ်ရေးခိုင်မာနေမှ ပြည်ထောင်စုမပြိုမကွဲရှိနေမည်။ ပြည်ထောင်စုကြီးတည်တံ့ခိုင်မြဲမှ အချုပ်အခြာပြည့်အာဏာလည်း တည်တံ့နေမည်ဖြစ်သည်။ ထို့ကြောင့် ရှေးကအမြော်အမြင်နှင့် အစဉ်အလာကြီးမားသော လူကြီးများက မျိုးဆက်သစ်လူငယ်များအတွက် အမျိုးသားရေးမူဝါဒတစ်ရပ် ချမှတ်ပေးခဲ့သည်။ ယနေ့ခေတ် ကာလတွင် ဒို့တာဝန်အရေးသုံးပါးဟု ခေါင်းစဉ်တပ်ကာ နိုင်ငံတော်ဖွဲ့စည်းပုံ အခြေခံဥပဒေတွင် နိုင်ငံသားတိုင်း စောင့်ထိန်းရန်တာဝန်အဖြစ် သတ်မှတ်ပြဋ္ဌာန်းပေးထားသည်။
ပြည်ထောင်စုမပြိုကွဲရေး၊ တိုင်းရင်းသား စည်းလုံးညီညွတ်မှုမပြိုကွဲရေး၊ အချုပ်အခြာအာဏာ တည်တံ့ခိုင်မြဲရေးသည် ပြည်ထောင်စုအသွင် ဖွဲ့စည်းတည်ဆောက်ထားသည့် မြန်မာနိုင်ငံအတွက် အထူးလိုအပ်လှသည့် အရေးကိစ္စဖြစ်သည်။ မြန်မာနိုင်ငံကို နယ်ချဲ့ကိုလိုနီတို့အုပ်ချုပ်ခဲ့စဉ်က တိုင်းရင်းသား အချင်းချင်းခိုက်ရန်ဖြစ်ပွားနေမှ ၎င်းတို့အုပ်ချုပ်မှုကြာရှည်မည်။ အုပ်ချုပ်လို့ ပိုမိုကောင်း မွန်ပေမည်ဟူသောစိတ်ဖြင့် မြန်မာတိုင်းရင်းသားအချင်းချင်းကို သွေးခွဲအုပ်ချုပ်ခဲ့သည်။ စာပေသမိုင်း ကြောင်းဆိုင်ရာများတွင်လည်း တိုင်းရင်းသားလူမျိုး အချင်းချင်းရန်လို မုန်းထားနေမည့် အတွေးအခေါ် အယူအဆများ ရေးသားခဲ့ကြသည်။ မည်သို့ပင်ဖြစ်ပါစေ တိုင်းရင်းသားအချင်းချင်းတို့သည် ညီရင်း အစ်ကို၊ မောင်ရင်းနှမစိတ်ဓာတ်ဖြင့် စည်းလုံးညီညွတ်မှုရှိခဲ့ကြသည်။ စည်းလုံးညီညွတ်မှုအရှိဆုံး အချိန်ကာလကိုလည်း သမိုင်းတွင် မှတ်ကျောက်တင်ထားပြီး ဖြစ်သည်။
တောင်တန်းနှင့်ပြည်မ သာတူညီမျှ တလုံးတစည်းတည်းဖြင့် လွတ်လပ်ရေးကို အရယူမည်ဟူသော သန္နိဋ္ဌာန်ဖြင့် ဗိုလ်ချုပ်အောင်ဆန်းနှင့် တိုင်းရင်းသားခေါင်းဆောင် ၂၂ ဦးတို့က ၁၉၄၇ ခုနှစ် ဖေဖော်ဝါရီလ ၁၂ ရက်နေ့၌ ရှမ်းပြည်နယ် ပင်လုံမြို့တွင် သမိုင်းဝင်ပင်လုံစာချုပ်ကို အောင်မြင်စွာ လက်မှတ် ရေးထိုးချုပ်ဆိုခဲ့ကြပါသည်။ ထိုသို့ ပြည်ထောင်စုစိတ်ဓာတ်ကို သက်သေထူနိုင်ခဲ့သည့် ဖေဖော်ဝါရီလ ၁၂ ရက်နေ့ကို ပြည်ထောင်စုနေ့အဖြစ် သမိုင်းမော်ကွန်းတင်ခဲ့ကြသည်မှာ ယနေ့ဆိုလျှင် (၇၇)နှစ် တိုင်ခဲ့ပြီ ဖြစ်ပါသည်။
၁၉၄၈ ခုနှစ် ဇန်နဝါရီလ ၄ ရက်တွင် မြန်မာနိုင်ငံသည် အချုပ်အခြာအာဏာပိုင်နိုင်ငံအဖြစ် ဂုဏ်ယူ ဝင့်ကြွားစွာဖြစ်တည်လာခဲ့ခြင်းဖြစ်သည်။ တိုင်းရင်းသားစည်းလုံးညီညွတ်မှု ထာဝစဉ်တည်တံ့နေသမျှ ပြည်ထောင်စုကြီး ထာဝရတည်တံ့ခိုင်မြဲနေမည်သာ ဖြစ်သည်။ ထိုသို့ခိုင်မြဲနေရန်မှာ တိုင်းရင်းသားများ သာမက နိုင်ငံသားအားလုံးတို့၏ ပြည်တွင်းအင်အားဖြင့် ကြိုးပမ်းတည်ဆောက်ကြရမည်ဖြစ်သည်။
ပြည်ထောင်စုသမ္မတ မြန်မာနိုင်ငံတော်အစိုးရ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော် ဝန်ကြီးချုပ်ဗိုလ်ချုပ်မှူးကြီး သတိုးမဟာသရေစည်သူ သတိုးသီရိသုဓမ္မမင်းအောင်လှိုင်က ၂၀၂၄ ခုနှစ် (၇၇)နှစ်မြောက် ပြည်ထောင်စုနေ့အခမ်းအနားသို့ ပေးပို့သည့်သဝဏ်လွှာတွင် “ပြည်ထောင်စု အကျိုး အမြဲရှေးရှုသော တပ်မတော်သည် ပြည်ထောင်စုမပြိုကွဲရေး၊ တိုင်းရင်းသား စည်းလုံးညီညွတ်မှု မပြိုကွဲရေး၊ အချုပ်အခြာအာဏာတည်တံ့ခိုင်မြဲရေးဟူသော ဒို့တာဝန်အရေး(၃)ပါးကို ဦးထိပ်ထားကာ ပြည်ထောင်စုကြီးကို ကာကွယ်စောင့်ရှောက်လျက်ရှိပါသည်။ “ပြည့်အင်အားသည် ပြည်တွင်းမှာသာ ရှိသည်” ဆိုသည့်အတိုင်း ပြည်ထောင်စုတစ်ဝန်းလုံးရှိ တိုင်းရင်းသားအားလုံး၏ အားပေးထောက်ခံမှုနှင့် တပ်မတော်နှင့် ပြည်သူတစ်သားတည်း ရပ်တည်မှုတို့သည် နိုင်ငံတော်ကာကွယ်ရေးအတွက် အခြေခံပံ့ပိုးမှု တစ်ရပ်ပင်ဖြစ်ပါသည်။ သို့ဖြစ်ပါ၍ တိုင်းပြည်တည်ငြိမ် အေးချမ်းရေးနှင့် တရားဥပဒေ စိုးမိုးရေးတို့ အပြည့်အဝရရှိစေရန်အတွက် နိုင်ငံတော်အစိုးရ၊ တပ်မတော်နှင့်ပြည်သူ ကြည်ဖြူစွာ လက်တွဲကြိုးပမ်းဆောင်ရွက်သွားကြရန် တိုက်တွန်းနှိုးဆော်အပ်ပါသည်” ဟု ဖော်ပြထားပါသည်။
နိုင်ငံတော်စီမံအုပ်ချုပ်ရေးကောင်စီသည် နိုင်ငံတော်၏ ကောင်းကျိုးစီးပွားကိုရှေးရှု၍ ရှေ့လုပ်ငန်းစဉ် (၅)ရပ်နှင့် နိုင်ငံရေး၊ စီးပွားရေး၊ လူမှုရေးဦးတည်ချက်(၉)ရပ်တို့ကို ချမှတ်အကောင်အထည် ဖော်လျက် ရှိရာ အောင်မြင်မှုရလဒ်များကို မြင်တွေ့နေကြရပြီ ဖြစ်သည်။ တိုင်းရင်းသားပြည်သူအားလုံး၏ လူမှုစီးပွားဘဝ ဖွံ့ဖြိုးတိုးတက်ရေးအတွက် တိုင်းရင်းသား ပြည်သူတစ်ရပ်လုံး အကျုံးဝင်သော စိုက်ပျိုးမွေးမြူရေးကို အခြေခံသည့် ကုန်ထုတ်လုပ်ငန်းများနှင့် MSME အခန်းကဏ္ဍတို့ကို မြှင့်တင် ဆောင်ရွက်ပေးလျက်ရှိပါသည်။
နိုင်ငံတော်၏ အမျိုးသားရေးရည်မှန်းချက်ဖြစ်သည့် တိုင်းပြည်သာယာဝပြောရေးနှင့် စားရေရိက္ခာ ဖူလုံရေးအတွက် တိုင်းရင်းသားပြည်သူအားလုံးက ဝိုင်းဝန်းကြိုးပမ်းဆောင်ရွက်ကြရမည်ဖြစ်သည်။ တိုင်းရင်းသားပြည်သူအားလုံး တရားမျှတခြင်း၊ လွတ်လပ်ခြင်း၊ ငြိမ်းချမ်းခြင်း၊ သာတူညီမျှ ဖြစ်ခြင်း ဟူသည့် လွတ်လပ်သောနိုင်ငံ၏ အနှစ်သာရများကို အားလုံးခံစားနိုင်စေရမည် ဖြစ်သည်။ အနှစ်ချုပ် ဆိုရသော် တိုင်းရင်းသားညီအစ်ကို မောင်နှမများ၏ ရင်းနှီးချစ်ကြည်မှု၊ စည်းလုံးညီညွတ်မှု၊ စုစည်း လုပ်ဆောင်မှုတို့ဖြင့် ခေတ်မီဖွံ့ဖြိုးတိုးတက်သော နိုင်ငံတော်ဖြစ်ပေါ်လာရေးနှင့် ဒီမိုကရေစီနှင့် ဖက်ဒရယ် စနစ်ကို အခြေခံသည့် ပြည်ထောင်စုကြီး ပေါ်ထွန်းလာရေး တိုင်းရင်းသားအားလုံးက ဝိုင်းဝန်း ဆောင်ရွက် ကြရန်ဖြစ်ပါကြောင်း။ ။